22,069 மாணவ-மாணவிகள் பிளஸ்-2 தேர்வு எழுதுகிறார்கள்

நெல்லை மாவட்டத்தில் பிளஸ்-2 தேர்வு 13-ந் தேதி (திங்கட்கிழமை) தொடங்குகிறது. இந்த தேர்வை 22 ஆயிரத்து 69 மாணவ- மாணவிகள் எழுதுகிறார்கள்.

பிளஸ்-2 தேர்வு

தமிழகம் முழுவதும் பிளஸ்-1 மற்றும் பிளஸ்-2 பொதுத்தேர்வு 13-ந் தேதி (திங்கட்கிழமை) தொடங்கி, அடுத்த மாதம் 5-ந்தேதி வரை நடக்கிறது. இதையொட்டி மாவட்டம் தோறும் தேர்வுக்கான ஏற்பாடுகள் மும்முரமாக நடைபெற்று வருகிறது.

நெல்லை மாவட்டத்தில் பிளஸ்-2 தேர்வுக்காக மொத்தம் 73 தேர்வு மையங்கள் அமைக்கப்பட்டுள்ளன. மாவட்டம் முழுவதும் உள்ள அரசு, அரசு உதவி பெறும், தனியார் பள்ளிகள் என மொத்தம் 184 பள்ளிகளை சேர்ந்த பிளஸ்-2 மாணவ-மாணவிகள் சுமார் 22 ஆயிரத்து 69 பேர் தேர்வு எழுத உள்ளனர். இதுதவிர பாளையங்கோட்டை மத்தியச்சிறை மற்றும் 4 தனியார் பள்ளிகளில் தனித்தேர்வர்கள் தேர்வு எழுத தேர்வு மையங்கள் அமைக்கப்பட்டு உள்ளன.

வினாத்தாள்கள்

இதற்கிடையே, வினாத்தாள்கள் சென்னையில் இருந்து கொண்டு வரப்பட்டு மாவட்டத்தில் 5 பள்ளிகளில் வைக்கப்பட்டு அங்கு துப்பாக்கி ஏந்திய போலீஸ் பாதுகாப்பு போடப்பட்டு உள்ளது. தேர்வு பணிகளில் சுமார் 1,500 ஆசிரியர்கள் ஈடுபட உள்ளனர்.

தேர்வு நாளன்று காலை 7 மணிக்கு வினாத்தாள்கள் போலீஸ் பாதுகாப்புடன் வாகனங்களில் எடுத்து செல்லப்பட்டு தேர்வு மையங்களில் ஒப்படைக்கப்பட உள்ளது. இதற்காக 16 வாகனங்கள் தயார் நிலையில் நிறுத்தி வைக்கப்பட்டு உள்ளன.

பறக்கும் படைகள்

தேர்வில் முறைகேடுகள், தவறுகள் நடக்காமல் இருக்கும் வகையில் கண்காணிப்பு பணிக்காக 7 பறக்கும் படைகள் அமைக்கப்பட்டு உள்ளன. இதுதவிர நிலையான படையும் ஒவ்வொரு மையத்திற்கும் ஏற்படுத்தப்பட்டு உள்ளது. இந்த ஏற்பாடுகளை மாவட்ட முதன்மை கல்வி அலுவலர் திருப்பதி ஆய்வு செய்து வருகிறார். இந்த நிலையில் பொதுத்தேர்வை எப்படி நடத்த வேண்டும் என்பது குறித்த ஆயத்த கூட்டம் பாளையங்கோட்டை சாராள் தக்கர் மகளிர் மேல்நிலைப்பள்ளியில் நேற்று முன்தினம் நடந்தது. கல்வித்துறை இணை இயக்குனர் ராமசாமி தலைமை தாங்கி, ஆலோசனை வழங்கினார். இதில் பள்ளி தலைமை ஆசிரியர்கள், உதவி தலைமை ஆசிரியர்கள், முதுகலை ஆசிரியர்கள் கலந்து கொண்டனர்.

எஸ்.எஸ்.எல்.சி. தேர்வு

நெல்லை மாவட்டத்தில் எஸ்.எஸ்.எல்.சி. தேர்வு அடுத்த மாதம் 6-ந் தேதி தொடங்கி 20-ந்தேதி வரை நடக்கிறது. 277 பள்ளிகளைச் சேர்ந்த 22 ஆயிரம் மாணவ-மாணவிகள் இந்த தேர்வை எழுதுகிறார்கள். இதற்காக 91 மையங்கள் தயார் செய்யப்பட்டு உள்ளன. இந்த பணியில் 1,800 ஆசிரியர்கள் ஈடுபடுத்தப்பட உள்ளனர்.