மேஸ்திரி வீட்டின் பூட்டை உடைத்து 25 பவுன் நகை, ரூ.4 லட்சம் திருட்டு

திருவண்ணாமலை

திருவண்ணாமலை அருகே திருமணம் நடைபெற்ற மேஸ்திரி வீட்டின் பூட்டை உடைத்து 25 பவுன் நகை, ரூ.4 லட்சம் திருடி சென்ற மர்ம நபர்களை போலீசார் தேடி வருகின்றனர்.

மேஸ்திரி

திருவண்ணாமலை நல்லவன்பாளையம் பசீர் நகர் பகுதியை சேர்ந்தவர் பிச்சாண்டி, மேஸ்திரி. இவரது மனைவி வசந்தி. இவர்களுக்கு ஒரு மகன், ஒரு மகள் உள்ளனர்.

கடந்த 28-ந் தேதி பிச்சாண்டியின் மகளுக்கு திருமணம் நடைபெற்றது. மறுநாள் இரவு அவர் மணமக்களை அழைத்து கொண்டு குடும்பத்துடன் வீட்டை பூட்டி விட்டு திருப்பதிக்கு சென்றார்.

அங்கிருந்து அவர்கள் நேற்று மாலை வீடு திரும்பினர். அப்போது வீட்டின் முன்பக்க கதவின் பூட்டு உடைக்கப்பட்டு இருந்ததை கண்டு அதிர்ச்சி அடைந்தனர்.

பின்னர் அவர்கள் வீட்டிற்கு சென்று பார்த்த போது வீட்டில் இருந்த பொருட்கள் கலைந்து இருந்தது. மேலும் பீரோவின் கதவும் உடைக்கப்பட்டு அதில் இருந்த பொருட்களுக்கும் சிதறி கீழே விழுந்து கிடந்தது.

நகை, பணம் திருட்டு

இதனால் மேலும் அதிர்ச்சியான அவர் பீரோவை பார்த்த போது அதில் இருந்த 25 பவுன் நகைகள் மற்றும் ரூ.4 லட்சம் மர்ம நபர்களால் திருடி சென்றது தெரியவந்தது.

இதுகுறித்து திருவண்ணாமலை தாலுகா போலீசாருக்கு தகவல் தெரிவிக்கப்பட்டது. அதன்போில் போலீசார் சம்பவ இடத்திற்கு விரைந்து சென்று விசாரணை நடத்தினர். மேலும் கைரேகை நிபுணர்கள் வரவழைக்கப்பட்டு சோதனை நடைபெற்றது.

தொடர்ந்து இதுகுறித்து வசந்தி கொடுத்த புகாரின் பேரில் திருவண்ணாமலை தாலுகா போலீசார் வழக்குப்பதிவு செய்து திருட்டு சம்பவத்தில் ஈடுபட்ட மர்மநபர்களை தேடி வருகின்றனர்.

திருமணம் நடைபெற்று ஓரிரு நாட்களே ஆன நிலையில் வீட்டில் மர்ம நபர்கள் புகுந்து நகை, பணம் கொள்ளையடித்த சம்பவம் அந்த பகுதியில் பெரும் பரபரப்பு ஏற்படுத்தி உள்ளது.