பெண் உள்பட 3 பேர் பலி

வெவ்வேறு விபத்துகளில் பெண் உள்பட 3 பேர் பலியானார்கள்.

தடுப்பில் மோதிய கார்

திண்டுக்கல் மாவட்டம், பழனியை சேர்ந்தவர் விக்னேஷ் (வயது 33). இவரது மனைவி சர்மிளா (25). சம்பவத்தன்று இவர்கள் காரில் சென்னையில் இருந்து பழனி நோக்கி வந்து கொண்டிருந்தனர். திருச்சி - திண்டுக்கல் தேசிய நெடுஞ்சாலையில் வையம்பட்டியை அடுத்த கீரனூர் அருகே புத்தானத்தம் பிரிவு சாலை என்ற இடத்தில் வந்து கொண்டிருந்த போது கட்டுப்பாட்டை இழந்த கார் சாலையின் மையப்பகுதியில் உள்ள தடுப்பில் மோதி விபத்துக்குள்ளானது.

இந்த விபத்தில் படுகாயம் அடைந்த சர்மிளா சம்பவ இடத்திலேயே உயிரிழந்தார். பலத்த காயம் அடைந்த விக்னேசை அக்கம்பக்கத்தினர் மீட்டு மணப்பாறை அரசு மருத்துவமனையில் சேர்த்துள்ளனர். இது குறித்த புகாரின் பேரில் வையம்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.

மற்றொரு விபத்து

இதே போல் வையம்பட்டி அருகே உள்ள இனாம்புதுவாடியை சேர்ந்தவர் கருப்பன் (19). இவர் மோட்டார் சைக்கிளில் கருங்குளம் பிரிவு சாலை அருகே சென்று கொண்டிருந்தார். அப்போது, அந்த வழியாக வந்த மொபட் அவர் மீது மோதியது. இதில் படுகாயமடைந்த கருப்பன் மணப்பாறை அரசு மருத்துவ மனைக்கு அனுப்பி வைக்கப்பட்டார். அங்கு அவர் சிகிச்சை பலன் இன்றி பரிதாபமாக இறந்தார். இது தொடர்பாக வையம்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.

வாகனம் மோதி பலி

*திருவெறும்பூரை அடுத்த திருநெடுங்குளம் ஊராட்சி நரிக்குறவர் காலனியை சேர்ந்தவர் ஜெய்சங்கர் (48). இவர் நேற்று முன்தினம் இரவு திருவாரூர் தேர்த்திருவிழாவில் ஊசி, பாசி விற்பதற்காக பஸ் ஏறுவதற்காக சென்றார். அப்போது, அந்த வழியாக வந்த வாகனம் ஒன்று அவர் மீது மோதிவிட்டு நிற்காமல் சென்றது. இதில் பலத்த காயம் அடைந்த அவர் சம்பவ இடத்திலேயே இறந்தார். இது குறித்து திருநெடுங்குளம் ஊராட்சி மன்ற தலைவர் ஸ்ரீநிதி சதீஷ்குமார் துவாக்குடி போலீசாருக்கு தகவல் தெரிவித்தார். அதன் பேரில் போலீசார் சம்வ இடத்துக்கு விரைந்து வந்து ஜெய்சங்கர் உடலை கைப்பற்றி துவாக்குடி அரசு மருத்துவமனைக்கு அனுப்பி வைத்தனர். பின்னர் இது தொடர்பாக வழக்குப்பதிவு செய்து அவர் மீது மோதிய வாகனம் குறித்து விசாரணை நடத்தி வருகின்றனர்.

சரக்குவேன்-பால்வேன் மோதல்

உப்பிலியபுரத்தை அடுத்த கோணப்பாதை அருகே பால்வேன் ஒன்று நின்றுக்கொண்டிருந்தது. அப்போது, அந்த வழியாக வந்த சரக்கு வேன் பால் வேன் மீது மோதியது. இதில் சரக்கு வேன் டிரைவர் புதுக்கோட்டையை சேர்ந்த சீனிவாசன், கிளீனர் மணிகண்டன் ஆகியோர் படுகாயம் அடைந்தனர். இது குறித்த புகாரின் பேரில் உப்பிலியபுரம் போலீசார் வழக்குப்பதிவு செய்து விசாரணை நடத்தி வருகின்றனர்.