கத்தியை காட்டி மிரட்டி பணம் பறித்த 5 பேர் கைது

தொழிலாளி, ஆட்டோ டிரைவர் உள்பட பலரிடம் கத்தியை காட்டி மிரட்டி பணம் பறித்த 5 பேர் கைது செய்யப்பட்டனர்.

காசாளர்

திருச்சி பாலக்கரை சங்கலியாண்டபுரம் வள்ளுவர் நகரை சேர்ந்தவர் ரவிச்சந்திரன் (வயது 48). இவர் மணல் வாரித்துறை பகுதியில் உள்ள மதுபான கடையில் காசாளராக பணிபுரிந்து வருகிறார்.

சம்பவத்தன்று மதுபான கடைக்கு ரவிச்சந்திரன் சென்று கொண்டிருந்த போது அவரை வழிமறித்து கத்தியை காட்டி மிரட்டி ஆயிரம் ரூபாயை பறித்த சங்கிலியாண்டபுரம் பகுதியை சேர்ந்த ஜஸ்டின் கிறிஸ்துராஜ் (24) என்பவரை பாலக்கரை போலீசார் கைது செய்தனர்.

கூலி தொழிலாளி

திருச்சி சிந்தாமணி அண்ணாநகரை சேர்ந்தவர் செல்வம் (32), கூலி தொழிலாளி. இவர் சம்பவத்தன்று சாலையில் நடந்து சென்றார். அப்போது, சங்கரன் பிள்ளை ரோடு பகுதியை சேர்ந்த முரளி குமார் (21) என்பவர் கத்தியை காட்டி மிரட்டி ஆயிரம் ரூபாயை பறித்துக் கொண்டு ஓடினார். இது தொடர்பாக செல்வம் கோட்டை போலீசில் புகார் கொடுத்தார். அதன் பேரில் போலீசார் வழக்குப்பதிவு செய்து முரளி குமாரை கைது செய்தனர்.

செல்போன் பறிப்பு

திருச்சி பெரியமிளகுபாறை காமராஜர் தெருவை சேர்ந்தவர் சுரேஷ் (32). சம்பவத்தன்று இவர் திருச்சி அரசு மருத்துவமனையில் தனது மனைவியை விட்டுவிட்டு பின்னர் கண் சிகிச்சை பிரிவு அருகே நடந்து சென்றார். அப்போது திருச்சி பாலக்கரை காஜா பேட்டை பகுதியை சேர்ந்த சம்பத்ராஜ் (32) என்பவர் கத்தியை காட்டிய மிரட்டி சுரேஷிடம் இருந்த செல்போன் மற்றும் ரூ.500-ஐ பறித்து கொண்டு ஓட முயன்றார். இதையடுத்து பொதுமக்கள் அவரை பிடித்து திருச்சி அரசு மருத்துவமனை போலீசில் ஒப்படைத்தனர். இந்த சம்பவம் குறித்து போலீசார் வழக்குப்பதிவு செய்து சம்பத்ராஜை கைது செய்துள்ளனர்.

ஆட்டோ டிரைவர்

இதேபோன்று திருச்சி எடமலைப்பட்டி புதூர் எம்.ஜி.ஆர். நகரை சேர்ந்தவர் சகாய குமார் (44). ஆட்டோ டிரைவரான இவரை மிரட்டி பணம் பறிக்க முயன்ற மணிகண்டம் அம்பேத்கர் தெருவை சேர்ந்த மகேந்திரன் (21), சத்யா (21) ஆகிய 2 பேரையும் எடமலைப்பட்டி புதூர் போலீசார் கைது செய்தனர்.