ரெயிலில் கடத்த முயன்ற 500 கிலோ ரேஷன் அரிசி பறிமுதல்

அரக்கோணம் ரெயில்வே போலீஸ் இன்ஸ்பெக்டர் விஜயலட்சுமி தலைமையிலான சப்- இன்ஸ்பெக்டர்கள் ஆனந்தன், ராமகிருஷ்ணன் மற்றும் போலீசார் அரக்கோணம் ரெயில் நிலையம் வழியாக வந்து செல்லும் ரெயில்கள், நடைமேடை பகுதிகளில் நேற்று காலை ரோந்து பணியில் ஈடுபட்டிருந்தனர்.

அப்போது சென்னையில் இருந்து திருப்பதி வரை செல்லும் மெமு ரெயிலில் சோதனை செய்த போது 16 பைகளில் சுமார் 500 கிலோ ரேஷன் அரிசி இருந்தது. இதையடுத்து போலீசார் நடத்திய விசாரணையில் திருநின்றவூர் பகுதியை சேர்ந்த ராணி (வயது 73) மற்றும் சரோஜா (71) ஆகியோர் ஆந்திர மாநிலத்திற்கு ரேஷன் அரிசி கடத்த முயன்றதும் தெரிய வந்தது.

இதனையடுத்து அவர்களிடம் இருந்து ரேஷன் அரிசியை பறிமுதல் செய்தனர். மேலும் 2 பேரையும் ராணிப்பேட்டை குடிமை பொருள் வழங்கல் குற்ற புலனாய்வு பிரிவு அலுவலரிடம் ஒப்படைத்தனர்.