திறனாய்வு தேர்வை 5,630 மாணவ-மாணவிகள் எழுதினர்

வேலூர் மாவட்டத்தில் 8-ம் வகுப்பு மாணவர்களுக்கு நடந்த திறனாய்வு தேர்வை 5 ஆயிரத்து 630 பேர் எழுதினார்கள். தேர்வு மையங்களை முதன்மை கல்வி அலுவலர் முனுசாமி பார்வையிட்டார்.

திறனாய்வு தேர்வு

தமிழக அரசு தேர்வுகள் சார்பில் அரசு மற்றும் அரசு நிதியுதவி பெறும் பள்ளிகளில் 8-ம் வகுப்பு படிக்கும் மாணவ-மாணவிகள் தேசிய வருவாய்வழி மற்றும் திறன்படிப்பு உதவித்தொகை (என்.எம்.எம்.எஸ்.) பெறும் தகுதியை நிர்ணயிக்கும் வகையிலான தேர்வு இன்று நடைபெற்றது.

வேலூர் மாவட்டத்தில் இந்த தேர்வை எழுத 5 ஆயிரத்து 848 மாணவ-மாணவிகள் விண்ணப்பித்து இருந்தனர்.அவர்கள் தேர்வு எழுத வேலூர் கொணவட்டம், தொரப்பாடி, பொய்கை, சேர்க்காடு, கே.வி.குப்பம், அணைக்கட்டு, ஆக்சீலியம், காட்பாடி அரசு பெண்கள் மேல்நிலைப்பள்ளி உள்பட மாவட்டம் முழுவதும் 20 மையங்கள் ஏற்பாடு செய்யப்பட்டிருந்தன.

காலை 9.30 முதல் 11 மணி வரை மனத்திறன் தேர்வும், 11.30 முதல் 1 மணி வரை படிப்பறிவு தேர்வும் நடைபெற்றது.

5,630 மாணவர்கள் தேர்வு எழுதினர்

தேர்வு மையங்களுக்கு மாணவர்கள் காலை 8 மணி முதல் வரத்தொடங்கினர். சோதனைக்கு பின்னர் 9 மணி அளவில் தேர்வறைக்குள் செல்ல அனுமதிக்கப்பட்டனர். செல்போன், கால்குலேட்டர், எலக்ட்ரானிக் கைக்கெடிகாரம் உள்ளிட்டவை கொண்டு செல்ல அனுமதிக்கப்படவில்லை.

திறனாய்வு தேர்வை 5 ஆயிரத்து 630 மாணவ-மாணவிகள் எழுதினர். 218 பேர் தேர்வு எழுதவில்லை.

வேலூர் தொரப்பாடி அரசு மேல்நிலைப்பள்ளி, காட்பாடி அரசு பெண்கள் மேல்நிலைப்பள்ளி உள்பட 4 மையங்களில் நடந்த திறனாய்வு தேர்வை வேலூர் மாவட்ட முதன்மை கல்வி அலுவலர் முனுசாமி பார்வையிட்டு ஆய்வு செய்தார்.

அதேபோன்று வேலூர், காட்பாடியில் உள்ள தேர்வு மையங்களை வேலூர் மாவட்ட கல்வி அலுவலர் அங்குலட்சுமியும் பார்வையிட்டார்.

தேர்வறை மற்றும் மையங்களை கண்காணிக்கும் பணியில் 500-க்கும் மேற்பட்ட ஆசிரியர்கள் ஈடுபட்டிருந்தனர். தேர்வு மையங்களுக்கு போலீஸ் பாதுகாப்பு போடப்பட்டிருந்தது.

கே.வி.குப்பம்

கே.வி.குப்பம் வட்டாரத்தில் கே.வி.குப்பம் அரசு ஆண்கள் மேல்நிலைப் பள்ளி, லத்தேரி அரசு ஆண்கள் மேல்நிலைப் பள்ளி ஆகிய 2 மையங்களில் தேர்வு நடைபெற்றது. 517 பேர் தேர்வு எழுதினர்.

தேர்வு மையங்களை கல்வி அதிகாரிகள் பார்வையிட்டனர்.