கேரளா சென்ற ரெயிலில் 6 கிலோ கஞ்சா பறிமுதல்

சூரமங்கலம்:

ரெயில்களில் கஞ்சா கடத்தப்படுவதை தடுக்கும் வகையில் ரெயில்வே போலீசார் ரெயில்களில் சோதனை நடத்தி வருகின்றனர். இதையொட்டி நேற்று சேலம் ரெயில்வே போலீஸ் சப்-இன்ஸ்பெக்டர் பாலமுருகன் மற்றும் முருகன் ஆகியோர் தலைமையில் ஜார்கண்ட் மாநிலத்தில் இருந்து கேரளா செல்லும் தன்பாத்- ஆலப்புழா எக்ஸ்பிரஸ் ரெயிலில் (வண்டி எண் 13351) சோதனை நடத்தினர், அப்போது முன்பதிவில்லா பெட்டியில் கேட்பாரற்று கிடந்த பையில் சோதனை நடத்தினர். அந்த பையில் 6 கிலோ கஞ்சா இருப்பது தெரியவந்தது, இதனையடுத்து ரெயில்வே போலீசார் 6 கிலோ கஞ்சாவை பறிமுதல் செய்து சேலம் ரெயில்வே போலீசில் ஒப்படைத்தனர். தொடர்ந்து போலீசார் வழக்குப்பதிவு செய்து, ரெயிலில் கஞ்சா கடத்தியது யார்? என்பது குறித்து விசாரணை நடத்தி வருகின்றனர்.