சூதாடிய 6 பேர் கைது

அருப்புக்கோட்டை,

அருப்புக்கோட்டை நகர் பகுதியில் பணம் வைத்து சூதாட்டம் நடப்பதாக போலீசாருக்கு ரகசிய தகவல் கிடைத்தது. அதன்பேரில் டவுன் இன்ஸ்பெக்டர் பாலமுருகன் தலைமையில் போலீசார் வெள்ளக்கோட்டை பகுதியில் ரோந்து பணியில் ஈடுபட்டனர். அப்போது போலீசாரை கண்டதும் சிலர் தப்பி ஓட முயன்றனர். அவர்களை பிடித்து விசாரணை மேற்கொண்டதில் அவர்கள் அப்பகுதியில் பணம் வைத்து சூதாட்டத்தில் ஈடுபட்டது தெரியவந்தது. விசாரணையில் அவர்கள் அருப்புக்கோட்டையை சேர்ந்த அருண்குமார் (வயது 31), சோலையப்பன் (41), ரமேஷ் (52), ரூபன் (41), ஆறுமுகம் (40), பாதுஷா (35) என்பது தெரியவந்தது. இதையடுத்து சூதாட்டத்தில் ஈடுபட்ட அவர்கள் 6 பேரையும் கைது செய்த போலீசார் அவர்களிடம் இருந்து ரூ.46 ஆயிரத்தையும் பறிமுதல் செய்தனர்.