சிறுமியை ஆபாச படம் எடுத்த 7 சிறுவர்கள் கைது

பாலியல் தொந்தரவு

திருச்சியில் 11 வயது சிறுமியை கடந்த சில நாட்களுக்கு முன்பு சிறுவர்கள் சிலர் பாழடைந்த கட்டிடத்துக்கு அழைத்துச்சென்று அவருக்கு பாலியல் தொந்தரவு கொடுத்துள்ளனர். இதனை செல்போனில் வீடியோவாகவும் பதிவு செய்துள்ளனர். பின்னர் இது பற்றி அறிந்த சிறுமியின் பெற்றோர், போலீசில் புகார் கொடுத்தனர்.

அதன்பேரில் விசாரணை நடத்திய பொன்மலை மகளிர் போலீசார் இந்த சம்பவத்தில் ஈடுபட்ட 7 பேரை பிடித்து விசாரித்தனர். விசாரணையில் அவர்கள் அனைவரும் 18 வயதுக்கு உட்பட்ட சிறுவர்கள் என்பது தெரியவந்தது. இது குறித்து போக்சோ சட்டத்தின் கீழ் வழக்குப்பதிவு செய்த போலீசார் அவர்கள் அனைவரையும் கைது செய்து, சிறுவர் சீர்திருத்த பள்ளியில் அடைத்தனர்.

பெண் பிணம்

*திருச்சி மத்திய பஸ் நிலையம் நடைபாதையில் 55 வயது மதிக்கத்தக்க பெண் பிணமாக கிடந்தார். இது குறித்து தகவல் அறிந்த கண்டோன்மெண்ட் போலீசார் அங்கு வந்து, அந்த பெண்ணின் உடலை பிரேத பரிசோதனைக்காக திருச்சி அரசு மருத்துவமனைக்கு அனுப்பி வைத்தனர். மேலும் அவர் யார்? என்பது குறித்து போலீசார் விசாரணை நடத்தி வருகின்றனர்.

*புள்ளம்பாடி ஒன்றியம் வந்தலைகூடலூர் கிராமத்தை சேர்ந்த பாலசுந்தரத்தின் மனைவி அபிராமி(வயது 20). இவர் கடந்த 5-ந் தேதி தனது தாய் வீடான லால்குடியை அடுத்த இடையாற்றுமங்கலம் சென்று வருவதாக கூறிவிட்டு சென்றார். பின்னர் அவர் வீடு திரும்பவில்லை. இது குறித்து காணக்கிளியநல்லூர் போலீஸ் சப்-இன்ஸ்பெக்டர் சங்கர் வழக்குப்பதிந்து அபிராமியை தேடி வருகின்றனர்.