7 டன் வேளாண் விளைபொருட்கள் ஏலம்

முத்தூர் ஒழுங்குமுறை விற்பனை கூடத்தில் 7 டன் வேளாண் விளைபொருட்கள் ஏலம் விடப்பட்டது.

ஒழுங்குமுறை விற்பனை கூடம்

முத்தூர் ஒழுங்குமுறை விற்பனை கூடத்தில் வாரந்தோறும் சனிக்கிழமை தேங்காய், தேங்காய் பருப்பு, எள் ஆகிய வேளாண் விளை பொருட்களின் ஏலம் நடைபெற்று வருகிறது. இதில் முத்தூர் சுற்றுவட்டார பகுதி விவசாயிகள் மற்றும் ஈரோடு மாவட்டம் கொல்லன்கோவில், சிவகிரி பேரூராட்சி பகுதிகள், அஞ்சூர் ஊராட்சி மற்றும் கரூர் மாவட்டம் அஞ்சூர், கார்வழி ஊராட்சி பகுதிகளை சேர்ந்த விவசாயிகள் பலர் நேரில் கலந்து கொண்டு தங்களது வேளாண் விளை பொருட்களை விற்று பலன் அடைந்து வருகின்றனர்.

அந்த வகையில் நேற்று காலை ஒழுங்குமுறை விற்பனை கூடத்திற்கு சுற்றுவட்டார விவசாயிகள் 14 ஆயிரத்து 272 தேங்காய்களை ஏலத்திற்கு கொண்டு வந்திருந்தனர். இதைத்தொடர்ந்து டெண்டர் முறையில் ஏலம் நடைபெற்றது. இதில் 1 கிலோ தேங்காய் அதிகபட்ச விலையாக ரூ.24.05-க்கும், குறைந்தபட்ச விலையாக ரூ.20.75-க்கும் ஏலம் விடப்பட்டது.

தேங்காய் ஏலம்

மேலும் 81 தேங்காய் பருப்பு மூட்டைகள் ஏலம் விடப்பட்டதில் 1 கிலோ தேங்காய் பருப்பு அதிகபட்ச விலையாக ரூ.81.70-க்கும், குறைந்தபட்ச விலையாக ரூ.68.70-க்கும் டெண்டர் முறையில் ஏலம் விடப்பட்டது.

மேலும் ஒழுங்குமுறை விற்பனை கூடத்தில் கடந்த வாரத்தை விட இந்த வாரம் 2 ஆயிரத்து 193 தேங்காய்களும், 26 தேங்காய் பருப்பு மூட்டைகளும் கூடுதலாக கொண்டு வரப்பட்டு ஏலம் விடப்பட்டது. இதில் கடந்த வாரத்தை விட இந்த வாரம் தேங்காய் ஒரு கிலோவிற்கு ரூ.1.15-ம், தேங்காய்பருப்பு 1 கிலோவிற்கு ரூ.3.20- ம் குறைவாகவே விவசாயிகளுக்கு கிடைத்தது. மேலும் கடந்த 4 மாதங்களுக்கு முன்பு தேங்காய் பருப்பு விலை கிலோ ரூ.90-ஐ தாண்டி ஏலம் விடப்பட்டு வந்த நிலையில் தற்போது வரை ரூ.90-க்கும் கீழே விலை சரிந்து ஏலம் விடப்பட்டு வருகிறது என்பது குறிப்பிடத்தக்கது.

7 டன் ஏலம்

மேலும் ஒழுங்குமுறை விற்பனை கூடத்தில் தேங்காய், தேங்காய் பருப்பு, எள் மூட்டைகள் 7 டன் அளவில் மொத்தம் ரூ‌.2 லட்சத்து 61 ஆயிரத்து 221-க்கு வேளாண் விளைபொருட்கள் ஏலம் விடப்பட்டது.

இந்த ஏலங்களில் திருப்பூர், ஈரோடு, கரூர், திண்டுக்கல் மாவட்டங்களை சேர்ந்த மொத்த வியாபாரிகள் கலந்துகொண்டனர். இத்தகவலை முத்தூர் ஒழுங்குமுறை விற்பனைக்கூட மேற்பார்வையாளர் கே.தங்கவேல் தெரிவித்துள்ளார்.