சாராயம் கடத்திய 8 பேர் கைது

சிக்கல்:

கீழ்வேளூர் அருகே சாராயம் கடத்தி வந்த 8 பேரை போலீசார் கைது செய்தனர். மேலும் அவர்களிடம் இருந்து கடத்தலுக்கு பயன்படுத்திய 7 மோட்டார் சைக்கிள்களை பறிமுதல் செய்தனர்..

வாகன சோதனை

நாகை மாவட்ட போலீஸ் சூப்பிரண்டு ஜவஹர் உத்தரவின் பேரில் நாகை மாவட்டத்தில் பல்வேறு இடங்களில் காரைக்கால் பகுதியில் இருந்து சாராயம் கடத்தி வந்து விற்பனை செய்வதை தடுக்கும் வகையில் போலீசார் வாகன சோதனை மற்றும் ரோந்து பணியில் ஈடுபட்டு வருகின்றனர்.

இந்த நிலையில் கீழ்வேளூர் போலீஸ் சரகம் பூலாங்குடி, ஒர்குடி பகுதியில் கீழ்வேளூர் போலீஸ் இன்ஸ்பெக்டர் தியாகராஜன் மற்றும் போலீசார் வாகன சோதனையில் ஈடுபட்டனர்.

சாராயம் கடத்தல்

அப்போது பூலாங்குடி பிரிவு சாலையில் ‌ஒரு மோட்டார் சைக்கிளில் வந்த 2 பேரை நிறுத்தி விசாரணை நடத்தினர். இதில் அவர்கள், பூலாங்குடி சிவன் கோவில் தெருவை சேர்ந்த அப்பாசாமி மகன் விக்னேஷ் (வயது 28), பூலாங்குடி மாதா கோவில் தெருவை சேர்ந்த தியாகராஜன் மகன் அருண் செல்வம் (20) என்பதும், இவர்கள் காரைக்கால் பகுதியில் இருந்து மோட்டார் சைக்கிளில்

சாராயம் கடத்தி வந்ததும் தெரியவந்தது. இதுகுறித்து போலீசார் வழக்குப்பதிவு செய்து அவர்கள் 2 பேரையும் கைதுசெய்தனர். மேலும் அவர்களிடம் இருந்து மோட்டார் சைக்கிளை பறிமுதல் செய்தனர்.

இதேபோல் பூலாங்குடி பாலம் அருகில் மோட்டார் சைக்கிளில் சாராயம் கடத்தி வந்த பூலாங்குடி சிவன் கோவில் தெருவை சேர்ந்த ரவிச்சந்திரன் மகன் தினேஷ் (20), பூலாங்குடி மாதா கோவில் தெருவை சேர்ந்த மோகன்தாஸ் மகன் விக்னேஷ்வரன் (21), கீழ்வேளூர் பிரிவு சாலையில் சாராயம் கடத்தி வந்த அகரகடம்பனூர் ஊராட்சி, ஸ்ரீகண்டிநத்தம் பகுதியை சேர்ந்த அன்பழகன் மகன் மோகன் (29), சிக்கவலம், கழவுகுளம் பகுதியை சேர்ந்த அன்பழகன் மகன்‌ அன்புமணி (29) ஆகிய 4 பேரை கைது செய்தனர்.

8 பேர் கைது

ஒர்குடி பாலம் பகுதியில் சாராயம் கடத்தி வந்த திருக்கண்ணங்குடி சிவன் கோவில் தெருவை சேர்ந்த குமார் மகன் கண்ணன் (24), காருதாகுடி பாலம் அருகில் சாராயம் கடத்தி வந்த காருதாகுடியை சேர்ந்த ராஜமுருகன் மகன் கிருஷ்ணராஜ் (22) ஆகிய 2 பேரை கைது செய்தனர்.கீழ்வேளூர் ரெயில்வேகேட், பட்டமங்கலம் மெயின்ரோடு ஆகிய இடங்களில் போலீசாரை பார்த்ததும் சாராயம் கடத்தி வந்தவர்கள் மோட்டார் சைக்கிள்களை அங்கேயே போட்டு விட்டு தப்பி ஓடி விட்டனர்.பின்னர் மோட்டார் சைக்கிள்களை பறிமுதல் செய்தனர்.கைது செய்யப்பட்ட 8 பேரிடம் இருந்து 770 லிட்டர் சாராயத்தையும், கடத்தலுக்கு பயன்படுத்திய 7 மோட்டார் சைக்கிள்களையும் பறிமுதல் செய்தனர். மேலும் தப்பி ஓடிய 2 பேரையும் வலைவீசி தேடி வருகின்றனர்