வங்கி ஊழியரை காரில் கடத்தி ரூ.12 லட்சம்-6 பவுன் நகைகள் கொள்ளை

தா.பேட்டை, ஜூலை.5-

தா.பேட்டை அருகே வங்கி ஊழியரை காரில் கடத்தில் ரூ.12 லட்சம் மற்றும் 6 பவுன் நகைகளை கொள்ளையடித்த மர்ம கும்பலை போலீசார் தேடி வருகின்றனர்.

இது குறித்து போலீஸ்தரப்பில் கூறப்படுவதாவது:-

காரில் கடத்தல்

திருச்சி மாவட்டம் தா.பேட்டை வடுகர்தெரு அண்ணாநகர் பகுதியை சேர்ந்தவர் முத்துசாமி. இவர் கனரா வங்கியில் கேஷியராக பணியாற்றி ஓய்வு பெற்றவர். குழந்தை இல்லாததாலும், மனைவி இறந்ததாலும் முத்துசாமி தனியாக வசித்து வருகிறார்.

இந்தநிலையில் நேற்று முன்தினம் காலை தா.பேட்டை அருகே வளையெடுப்பு கிராமத்தில் உள்ள உறவினரை பார்ப்பதற்காக முத்துசாமி மொபட்டில் சென்றார். பின்னர் மீண்டும் தா.பேட்டை நோக்கி மொபட்டில் வந்தார். அப்போது ஏரிக்கரை அருகில் சிறுநீர் கழிப்பதற்காக மொபட்டை நிறுத்தியபோது காரில் பின் தொடர்ந்து வந்த மர்மநபர்கள் 5 பேர் திடீரென முத்துசாமியின் கையையும், கண்களையும் துணியால் கட்டி காரில் ஏற்றி கடத்தி சென்றனர்.

சாவியை பறித்து வீட்டில் கொள்ளை

மேலும் முத்துசாமியின் மொபட்டையும் மர்ம நபர்கள் ஓட்டி சென்றுள்ளனர். நேற்று முழுவதும் ஒரு அறையில் முத்துசாமியை அடைத்து வைத்து வீட்டின் பீரோ சாவியை கேட்டு கத்தியால் குத்தியும், தாக்கியும் மர்ம நபர்கள் சித்தரவதை செய்தனர்.

பின்னர் முத்துசாமியிடம் இருந்த வீட்டின் சாவியை பறித்த மர்மநபர்கள் நள்ளிரவில் முத்துசாமியின் வீட்டை திறந்து உள்ளே சென்றனர். வீட்டில் பீரோவில் இருந்த ரூ.12 லட்சம், 6 பவுன் தங்க நகைகளை கொள்ளையடித்துள்ளனர்.

போலீசில் புகார்

இதைத்தொடர்ந்து நேற்று அதிகாலையில், அந்த மர்ம நபர்கள் முத்துசாமியை துறையூர் அருகே சிக்கத்தம்பூர் பகுதியில் இறக்கிவிட்டு, விட்டு யாரிடமாவது சொன்னால் கொலை செய்து விடுவோம் என மிரட்டல் விடுத்து சென்றுள்ளனர். மர்ம நபர்கள் தாக்கியதில் காயம் அடைந்த முத்துசாமி தா.பேட்டை அரசு மருத்துவமனையில் சிகிச்சைக்காக சேர்ந்தார். பின்னர் அவர் நடந்த சம்பவம் குறித்து தா.பேட்டை போலீஸ் நிலையத்தில் புகார் அளித்தார்.

அதன் பேரில் முசிறி துணை போலீஸ் சூப்பிரண்டு அருள்மணி, இன்ஸ்பெக்டர் ராஜேஸ்வரி, ஜெம்புநாதபுரம் சப்-இன்ஸ்பெக்டர் சுபாஷினி மற்றும் போலீசார் சம்பவ இடத்துக்கு நேரில் வந்து விசாரணை நடத்தினர். திருச்சியில் இருந்து மோப்பநாய் லாலி வரவழைக்கப்பட்டது. தடயவியல் நிபுணர்கள் கைரேகை, தடயங்களை சேகரித்து கொண்டனர்.

பரபரப்பு

இந்த சம்பவம் குறித்து ஜெம்புநாதபுரம் போலீசார் வழக்குப்பதிவு செய்து, மர்மகும்பலை தேடி வருகின்றனர். மேலும் முத்துசாமி தெரிவித்த மர்மநபர்களின் அடையாளத்தை வைத்து, அவர்கள் குறித்து புலன் விசாரணை மேற்கொண்டுள்ளனர்.

ஓய்வுபெற்ற வங்கி ஊழியரை கடத்தி நகை-பணத்தை கொள்ளையடித்த சம்பவம் தா.பேட்டை பகுதியில் பரபரப்பை ஏற்படுத்தி உள்ளது.