நண்பரை தாக்கியவர்கள் மீது கொலை முயற்சி வழக்கு

பெரம்பலூர் வெங்கடேசபுரம் காலனியை சேர்ந்தவர் ஆனந்தசெல்வன்(வயது 38). இவர் நேற்று மாலை வெங்கடேசபுரத்தில் ஒரு வங்கி அருகே தனது நண்பர்களான அதே பகுதியை சேர்ந்த பிரித்திகைவாசன், இளம்பரிதி, சுந்தர் மற்றும் சிலருடன் சேர்ந்து மது குடித்ததாக கூறப்படுகிறது. அப்போது குடிபோதையில் அவர்களுக்கிடையே ஏற்பட்ட வாய் தகராறு கைக்கலப்பாக மாறியதாக தெரிகிறது. இதில் பிரித்திகைவாசன், இளம்பரிதி, சுந்தர் மற்றும் சிலர் சேர்ந்து ஆனந்தசெல்வனை தாக்கிவிட்டு தப்பி சென்றதாக கூறப்படுகிறது. இதில் படுகாயமடைந்த ஆனந்தசெல்வனை அந்த வழியாக சென்றவர்கள் மீட்டு சிகிச்சைக்காக பெரம்பலூர் அரசு மருத்துவமனையில் சிகிச்சைக்காக சேர்த்தனர். அவரிடம் வாக்குமூலம் பெற்ற பெரம்பலூர் போலீசார், கொலை முயற்சி வழக்குப்பதிவு செய்து தலைமறைவான பிரித்திகைவாசன், இளம்பரிதி, சுந்தர் உள்ளிட்டோரை வலைவீசி தேடி வருகின்றனர். இதில் பிரித்திகைவாசன் மீது ஏற்கனவே பெரம்பலூர் போலீஸ் நிலையத்தில் பல்வேறு வழக்குகள் நிலுவையில் உள்ளதாக போலீசார் தெரிவித்தனர்.