தறிகெட்டு ஓடி அடுத்தடுத்து 4 வாகனங்கள் மீது மோதிய கல்லூரி பஸ்

திருச்சி,

திருச்சி மாவட்டம் கூத்தூரில் விக்னேஷ் பாலிடெக்னிக் கல்லூரி உள்ளது. இந்த கல்லூரி பஸ் நேற்று காலை 50-க்கும் மேற்பட்ட மாணவர்களுடன் ஸ்ரீரங்கத்தில் இருந்து கூத்தூர் நோக்கி சென்று கொண்டிருந்தது. கல்லூரி பஸ்சை திருச்சி தென்னூர் பிஷப்ரோட்டை சேர்ந்த கண்ணன் என்பவர் ஓட்டினார். அந்த பஸ் ஸ்ரீரங்கம் திருவானைக்காவல் ரெயில்வே மேம்பாலத்தில் ஏறி, இறங்கும்போது அதன்வேகம் அதிகமாக இருந்துள்ளது. பஸ்சின் வேகத்தை டிரைவரால் கட்டுப்படுத்த முடியவில்லை என்று கூறப்படுகிறது.

அடுத்தடுத்த வாகனங்களில் மோதல்

இதையடுத்து டிரைவரின் கட்டுப்பாட்டை இழந்த பஸ் தாறுமாறாக ஓடி சாலையின் ஓரத்தில் நின்ற ஆட்டோ, மோட்டார் சைக்கிள், ஸ்கூட்டர் என அடுத்தடுத்த வாகனங்கள் மீது மோதியதுடன் நிற்காமல் எதிரே வந்த ஏ.கே.கே.வி. என்ற தனியார் பள்ளி வேன் மீதும் நேருக்கு நேர் மோதி விபத்துக்குள்ளானது.

இதில் ஆட்டோ, மோட்டார் சைக்கிள், ஸ்கூட்டர், பள்ளி வேன் சேதம் அடைந்தன. அதுமட்டுமின்றி இந்த விபத்தில் லால்குடி எசனக்கோரை பகுதியை சேர்ந்த பள்ளி வேன் டிரைவர் மணிகண்டன் (வயது46), பள்ளி மாணவர்கள் திருவானைக்காவல் அஸ்வின் கிருஷ்ணன் (13), யோசிதா (9), வாளாடி அபிராமி (11), தாளக்குடி சர்வேஷ் (10) மற்றும் சாலையோரத்தில் நின்று கொண்டு இருந்த வீரேஷ்வரம் பகுதியை சேர்ந்த செல்வராஜ் (66), திருவானைக்காவல் காந்திரோடு கோபி (48), இந்திராணி (65), மொட்ட கோபுரம் பாஸ்கர் (41) உள்பட 10-க்கும் மேற்பட்டோர் படுகாயம் அடைந்தனர்.