போடியில் கல்லூரி மாணவர் தற்கொலை

போடி குப்பிநாயக்கன்பட்டியை சேர்ந்தவர் தரணீஸ்வரன் (வயது 18). இவர் போடி அருகே உள்ள தனியார் கலைக்கல்லூரியில் பி.காம். முதலாம் ஆண்டு படித்து வந்தார். தரணீஸ்வரன் சரிவர கல்லூரிக்கு செல்லாமல் இருந்து வந்ததாக கூறப்படுகிறது. இதனை அவரது பெற்றோர் கண்டித்துள்ளனர். இதனால் மனமுடைந்த நிலையில் காணப்பட்ட தரணீஸ்வரன் நேற்று முன்தினம் மாலை வீட்டில் யாரும் இல்லாத போது விஷம் குடித்தார்.

இதில் மயங்கி விழுந்த அவரை அக்கம்பக்கத்தினர் மீட்டு சிகிச்சைக்காக போடி அரசு மருத்துவமனைக்கு கொண்டு சென்றனர். அங்கு அவரை பரிசோதனை செய்த டாக்டர்கள், தரணீஸ்வரன் ஏற்கனவே இறந்துவிட்டதாக தெரிவித்தனர். இந்த தற்கொலை குறித்து போடி டவுன் போலீசார் வழக்குப்பதிவு செய்து விசாரணை நடத்தி வருகின்றனர்.