தேனி அருகே கார் மோதி முதியவர் பலி

தேனி அருகே உள்ள கோட்டைப்பட்டியை சேர்ந்தவர் சின்னராசு (வயது 60). இவர் புங்கை மரத்தின் விதைகளை சேகரித்து விற்பனை செய்து வந்தார். இதற்காக நேற்று அவர் நாகலாபுரம் அருகில் சாலையோரம் இருந்த புங்கை மரத்தின் அடியில் விதைகளை சேகரித்துக்கொண்டு இருந்தார்.

அப்போது அந்த வழியாக வந்த கார், சின்னராசு மீது மோதியது. இதில் படுகாயம் அடைந்த அவர் சம்பவ இடத்தில் உயிரிழந்தார். இதுகுறித்து தகவல் அறிந்ததும் பழனிசெட்டிபட்டி போலீசார் அங்கு விரைந்து சென்று, சின்னராசுவின் உடலை கைப்பற்றி பிரேத பரிசோதனைக்காக தேனி அரசு மருத்துவ கல்லூரி மருத்துவமனைக்கு அனுப்பி வைத்தனர்.

மேலும் இதுதொடர்பாக காரை ஓட்டி வந்த சில்லமரத்துப்பட்டியை சேர்ந்த பிரபு (40) என்பவர் மீது போலீசார் வழக்குப்பதிவு செய்து விசாரணை நடத்தி வருகின்றனர்.