தொடர் வாகன திருட்டில் ஈடுபட்டவர் கைது

மன்னார்குடி அரசு மாவட்ட தலைமை ஆஸ்பத்திரியில் மன்னார்குடி மற்றும் அதன் சுற்றுவட்டார கிராமங்களை சேர்ந்த நூற்றுக்கணக்கானோர் தினமும் ஆஸ்பத்திரிக்கு வந்து செல்கின்றனர். அவ்வாறு ஆஸ்பத்திரிக்கு வருபவர்களின் மோட்டார் சைக்கிள்கள் அவ்வப்போது திருடுபோவது தொடர்கதையாகி வந்தது. இதுகுறித்து மன்னார்குடி போலீஸ் நிலையத்தில் புகார்கள் குவிந்தன. இந்தநிலையில் நேற்று முன்தினம் மாலை சந்தேகத்தின் பேரில் ஆஸ்பத்திரி வளாகத்தில் ஒருவர் சுற்றி கொண்டிருந்தார். அவரை பிடித்து போலீசார் விசாரணை நடத்தியதில், அவர் தஞ்சை வண்டிக்கார தெருவை சேர்ந்த சங்கர் (வயது 50) என்பதும், அவர் இந்த ஆஸ்பத்திரியில் தொடர்ந்து பல வாகனங்களை திருடி சென்றதும் தெரியவந்தது. இதுகுறித்து போலீசார் வழக்குப்பதிவு செய்து சங்கரை கைது செய்து, அவரிடம் இருந்து 5 மோட்டார்சைக்கிள்களை பறிமுதல் செய்தனர்.