தோட்டத்தில் பதுங்கிய மலைப்பாம்பு

ஒட்டன்சத்திரம் அருகே உள்ள சின்னகரட்டுப்பட்டியை சேர்ந்தவர் முருகேசன். விவசாயி. இவருக்கு சொந்தமான தோட்டம், வீரமல்லன்குளம் அருகே உள்ளது. அங்கு முருகேசன் சோளம் சாகுபடி செய்துள்ளார். இந்தநிலையில் நேற்று அவரது தோட்டத்தில் சோளம் அறுவடை செய்யும் பணியில் பெண்கள் சிலர் ஈடுபட்டிருந்தனர். அப்போது, சோள தட்டைகளுக்கு இடையே சுமார் 7 அடி நீளமுள்ள மலைப்பாம்பு பதுங்கியிருந்தது. இதனை பார்த்து அதிர்ச்சியடைந்த பெண்கள், முருகேசனுக்கு தகவல் தெரிவித்தனர். இதுகுறித்து அவர் உடனடியாக ஒட்டன்சத்திரம் தீயணைப்பு நிலையத்திற்கு தகவல் அளித்தார். அதன்பேரில் சம்பவ இடத்திற்கு விரைந்து வந்த தீயணைப்பு படைவீரர்கள், தோட்டத்தில் பதுங்கியிருந்த மலைப்பாம்பை லாவமாக பிடித்தனர். பின்னர் அந்த பாம்பு, ஒட்டன்சத்திரம் வனத்துறை அலுவலர்களிடம் ஒப்படைக்கப்பட்டது. பின்னர் அவர்கள், அந்த மலைப்பாம்பை அடர்ந்த வனப்பகுதியில் கொண்டுபோய் விட்டனர்.