பஸ்சில் படிக்கட்டில் பயணம் செய்த மாணவர் தவறி விழுந்து காயம்

பாவூர்சத்திரம்:

பாவூர்சத்திரம் அருகே மேலப்பாவூர் பகுதியை சேர்ந்த 18 வயது மாணவர் ஒரு தனியார் பாலிடெக்னிக் கல்லூரியில் 2-ம் ஆண்டு படித்து வருகிறார். நேற்று காலையில் கல்லூரி செல்வதற்காக பாவூர்சத்திரத்தில் இருந்து நெல்லை செல்லும் அரசு பஸ்சில் ஏறி உள்ளார். பஸ்சில் கூட்டம் அதிகமாக இருந்ததால் படிக்கட்டில் நின்று கொண்டு பயணம் செய்தார். பாவூர்சத்திரம் சி.எஸ்.ஐ. கிறிஸ்தவ ஆலயம் அருகே பஸ் சென்றபோது, எதிர்பாராதவிதமாக படிக்கட்டில் இருந்து தவறி சாலையோரம் விழுந்தார். இதில் அவருக்கு பலத்த காயம் ஏற்பட்டது.

உடனே அவரை அக்கம்பக்கத்தினர் மீட்டு பாவூர்சத்திரத்தில் உள்ள ஒரு தனியார் ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இந்த விபத்து குறித்து பஸ் டிரைவர் பழனிகுமார் (வயது 47), கண்டக்டர் அர்ஜூணகுமார் (37) ஆகியோரிடம் பாவூர்சத்திரம் போலீசார் விசாரணை நடத்தி வருகின்றனர்.