டிராக்டரில் இருந்து தவறி விழுந்த வாலிபர் பலி

டிராக்டரில் சென்றனர்

சிறுகனூர் அருகே உள்ள கல்லகம் சில்லக்குடி சாலையை சேர்ந்தவர் ரெங்கராஜ். கூலி வேலை செய்து வருகிறார். இவரது மகன் பாலசுப்பிரமணியம்(வயது 19). இவரும், அந்த பகுதியை சேர்ந்த பிரதீப்(20) என்பவரும் நண்பர்கள்.

நேற்று காலை அதே பகுதியை சேர்ந்த தேவேந்திரன் என்பவர் எம்சாண்ட், சிமெண்டு ஏற்றிக்கொண்டு சிறுகனூர் அருகே உள்ள நம்புகுறிச்சியில் இருந்து கல்லகம் நோக்கி டிராக்டரில் சென்று கொண்டிருந்தார். அந்த டிராக்டரில் பாலசுப்பிரமணியம், பிரதீப் ஆகியோர் அமர்ந்திருந்தனர்.

தவறி விழுந்து சாவு

நம்புகுறிச்சியில் இருந்து கல்லகம் செல்லும் சாலையில் உள்ள நந்தியார்பாலம் அருகே இருந்த பள்ளத்தில் சென்றபோது, டிராக்டரில் இருந்து எதிர்பாராதவிதமாக பாலசுப்பிரமணியம் தவறி கீழே விழுந்தார். இதில் படுகாயம் அடைந்து உயிருக்கு போராடிய அவரை அங்கிருந்தவர்கள் மீட்டு ஆம்புலன்ஸ் மூலம் சிகிச்சைக்காக அரியலூர் அரசு மருத்துவமனைக்கு கொண்டு சென்றனர். அங்கு அவரை பரிசோதனை செய்த டாக்டர்கள் அவர் ஏற்கனவே இறந்து விட்டதாக தெரிவித்தனர்.

இதுபற்றி தகவல் அறிந்த சிறுகனூர் போலீஸ் இன்ஸ்பெக்டர் சுமதி, சப்-இன்ஸ்பெக்டர் கேசவமூர்த்தி மற்றும் போலீசார் சம்பவ இடத்திற்கு சென்று விசாரணை நடத்தினர். மேலும், இது குறித்து வழக்குப்பதிவு செய்த போலீசார், டிராக்டரை ஓட்டிச் சென்ற தேவேந்திரனை கைது செய்து விசாரணை நடத்தி வருகின்றனர்.