அளவுக்கு அதிகமாக மது குடித்தவா் சாவு

கோவை மாவட்டம் கரும்பு கடையை சேர்ந்தவர் தமீம் (வயது 51). கூலித்்தொழிலாளி. தமீமுக்கு குடிப்பழக்கம் இருந்து வந்ததாக கூறப்படுகிறது.

இந்த நிலையில் நேற்று முன்தினம் இவர் கோவையை சேர்ந்த 3 நண்பர்களுடன் ஈரோடு மாவட்டம் கோபி அருகே உள்ள கொடிவேரி அணைக்கு சுற்றுலா வந்து உள்ளார். அப்போது அளவுக்கு அதிகமாக தமீம் மது குடித்ததாக கூறப்படுகிறது. இதனால் குடிபோதையில் இருந்த அவரை காரில் படுக்க வைத்துவிட்டு மற்ற நண்பர்கள் கொடிவேரி அணையில் குளிக்க சென்றுவிட்டனர். குளித்துவிட்டு திரும்பி வந்து பார்த்தபோது உடல் நலம் பாதிக்கப்பட்ட நிலையில் தமீம் இருந்து உள்ளார். இதனால் அவரை சிகிச்சைக்காக சத்தியமங்கலம் அரசு ஆஸ்பத்திரிக்கு நண்பர்கள் கொண்டு சென்றனர். அங்கு பரிசோதனை செய்த டாக்டர்கள் ஏற்கனவே தமீம் இறந்துவிட்டதாக தெரிவித்தனர். இதுகுறித்து கடத்தூர் போலீசார் வழக்குப்பதிவு செய்து விசாரணை நடத்தி வருகிறார்கள்.