மோட்டார் சைக்கிளில் இருந்து கீழே விழுந்த பெண் பலி

சிவகாசி,

சாத்தூர் அருகே உள்ள இருக்கன்குடி கிராமத்தை சேர்ந்தவர் பழனி. இவரது மனைவி ராஜம்மாள் (வயது 45). இவர் சம்பவத்தன்று தனது மகன் அருண்குமார் (24) என்பவருடன் மோட்டார் சைக்கிளில் சாத்தூர்- கோவில்பட்டி ரோட்டில் சென்று கொண்டிருந்தார். அப்போது அந்த சாலையில் மதுரை பஸ் நிறுத்தம் அருகில் இருந்த வேகத்தடையை கடந்த போது திடீரென மோட்டார் சைக்கிளில் அமர்ந்திருந்த ராஜம்மாள் தவறி கீழே விழுந்தார். இதில் அவருக்கு பலத்த காயம் ஏற்பட்டது. இதை தொடர்ந்து அங்கிருந்தவர்கள் ராஜம்மாளை மீட்டு அதே பகுதியில் உள்ள தனியார் ஆஸ்பத்திரியில் சிகிச்சைக்காக சேர்த்தனர். அங்கு முதலுதவி அளிக்கப்பட்டு பின்னர் மேல் சிகிச்சைக்காக மதுரை பெரிய ஆஸ்பத்திரியில் சேர்த்தனர். அங்கு சிகிச்சை பலன் அளிக்காமல் அவர் பரிதாபமாக இறந்தார். இந்த சம்பவம் குறித்து ராஜம்மாளின் மகள் ஆர்த்தி கொடுத்த புகாரின் பேரில் சாத்தூர் டவுன் போலீசார் வழக்குபதிவு செய்து விசாரணை நடத்தி வருகிறார்கள்.