மோட்டார் சைக்கிள் விபத்தில் எலக்ட்ரீசியன் பலி

பனமரத்துப்பட்டி:

வாழப்பாடி அருகே திருமனூர் ராஜகணபதி நகரை சேர்ந்த வேலு மகன் பரத் (வயது 24). இதே பகுதியை சேர்ந்த முருகேசன் மகன் வினோத் (21). இவர்கள் இருவரும் எலக்ட்ரீசியன். நேற்று இவர்கள் பனமரத்துப்பட்டிக்கு வேலைக்கு சென்றனர். அங்கு வேலையை முடித்துவிட்டு மாலை 4 மணியளவில் இருவரும் மோட்டார் சைக்கிளில் வீடு திரும்பி கொண்டிருந்தனர். மோட்டார் சைக்கிளை வினோத் ஓட்டி சென்றார். இருவரும் கம்மாளப்பட்டி வாத்தியார் காடு அருகே சென்றபோது திடீரென மோட்டார் சைக்கிள் நிலை தடுமாறி இருவரும் சாலையில் விழுந்தனர். பலத்த காயம் அடைந்த இருவரையும் அக்கம் பக்கத்தினர் மீட்டு சேலம் அரசு ஆஸ்பத்திரியில் சேர்த்தனர். அங்கு சிகிச்சை பலன் அளிக்காமல் பரத் பரிதாபமாக இறந்தார். விபத்து குறித்து பனமரத்துபட்டி போலீசார் வழக்குப்பதிவு செய்து விசாரணை நடத்தினர்.