மோட்டார் சைக்கிளில் சென்ற வாலிபர் குளத்தில் தவறி விழுந்து சாவு

திருவாரூர் மாவட்டம் கோட்டூர் அருகே உள்ள நந்திமாங்குடி கிராமத்தை சேர்ந்தவர் ரவி. விவசாயி. இவருடைய மகன் விக்னேஷ் (வயது25). வெளிநாட்டில் வேலை பார்த்து வந்த இவர், விடுமுறையில் ஊருக்கு வந்து இருந்தார். நேற்று மாலை இவர் கீழபுழுதிக்குடி கிராமத்தில் உள்ள தனது வயலுக்கு மோட்டார் சைக்கிளில் சென்றார். அப்போது பலத்த மழை பெய்தது. இந்த நிலையில் அவர் மோட்டார் சைக்கிளுடன் குளத்தில் தவறி விழுந்தார். இதில் அவர் குளத்தில் மூழ்கி பரிதாபமாக இறந்தார். இந்த நிலையில் இன்று காலை அந்த வழியாக வந்தவர்கள் குளத்தில் விக்னேஷ் பிணமாக மிதப்பதை கண்டு உடனடியாக விக்கிரபாண்டியம் போலீஸ் நிலையத்துக்கு தகவல் தெரிவித்தனர். அதன்பேரில் போலீசார் அங்கு சென்று உடலை மீட்டு மன்னார்குடி அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர். இதுகுறித்து விக்கிரபாண்டியம் போலீசார் வழக்குப்பதிவு செய்து விசாரணை செய்து வருகின்றனர்.