ஊத்தங்கரை அருகே தேசிய நெடுஞ்சாலையில் லாரிகள் நேருக்கு நேர் மோதல்-2 மணி நேரம் போக்குவரத்து பாதிப்பு

ஊத்தங்கரை:

ஊத்தங்கரை அருகே தேசிய நெடுஞ்சாலையில் லாரிகள் நேருக்கு நேர் மோதி விபத்துக்குள்ளாகின. இதனால் 2 மணி நேரம் போக்குவரத்து பாதிக்கப்பட்டது.

லாரிகள் மோதல்

உத்தரபிரதேச மாநிலத்தில் இருந்து எந்திரத்தை ஏற்றி கொண்டு புதுச்சேரி நோக்கி கன்டெய்னர் லாரி ஒன்று கிருஷ்ணகிரி வழியாக சென்று கொண்டிருந்தது. இதேபோல் சென்னையில் இருந்து கண்ணாடிகளை ஏற்றி கொண்டு கொச்சின் நோக்கி லாரி ஒன்று சென்றது.

இந்த 2 லாரிகளும் ஊத்தங்கரை அருகே மிட்டப்பள்ளி தேசிய நெடுஞ்சாலையில் நேருக்கு நேர் மோதி கொண்டன. இந்த விபத்தில் கன்டெய்னர் லாரியை ஓட்டி வந்த உத்தரபிரதேசத்தை சேர்ந்த டிரைவர் ரமேஷ் சிங் (வயது 56) இடிபாடுகளில் சிக்கி பலத்த காயம் அடைந்தார்.

இதேபோல் மற்றொரு லாரியை ஓட்டி வந்த ஆரணியை சேர்ந்த ஜெகதீஸ்வரன் (37), உடன் வந்த டிரைவர் ராஜசேகர் (35) ஆகியோர் லேசான காயம் அடைந்தனர். இந்த விபத்தால் சென்னை-கிருஷ்ணகிரி தேசிய நெடுஞ்சாலையில் போக்குவரத்து பாதிக்கப்பட்டது.

டிரைவர் மீட்பு

இதுகுறித்து தகவல் அறிந்த சிங்காரப்பேட்டை போலீசார் மற்றும் ஊத்தங்கரை தீயணைப்பு வீரர்கள் அங்கு விரைந்து சென்றனர். அவர்கள் லாரியின் இடிபாடுகளில் சிக்கிய டிரைவர் ரமேஷ் சிங்கை மீட்டு, சிகிச்சைக்காக ஊத்தங்கரை அரசு ஆஸ்பத்திரிக்கு அனுப்பி வைத்தனர்.

மேலும் 2 மணி நேரமாக பாதிக்கப்பட்ட போக்குவரத்தை சீரமைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.