தொப்பூர் கனவாயில்மோட்டார்சைக்கிள் மீது லாரி மோதி பெண் பலிமகன் கண்முன்னே நேர்ந்த பரிதாபம்

நல்லம்பள்ளி:

தொப்பூர் கனவாயில் மோட்டார்சைக்கிள் மீது லாரி மோதி மகன் கண் எதிரே தாய் பலியானார்.

பெண் பலி

சேலம் மாவட்டம் பனமரத்துப்பட்டியை சேர்ந்தவர் ராமசாமி. இவருடைய மனைவி ஜோதி (வயது 50). இந்த நிலையில் ஜோதி மற்றும் அவருடைய மகன் விக்னேஷ் (25) ஒரு மோட்டார்சைக்கிளில் தர்மபுரி மாவட்டம் மாரண்டஅள்ளிக்கு சென்றுவிட்டு பின்னர் சேலம் திரும்பி கொண்டிருந்தனர்.

அப்போது தர்மபுரி தொப்பூர் கனவாயில் சென்றபோது, பின்னால் வந்த லாரி ஒன்று மோட்டார் சைக்கிள் மீது மோதியது. இதில் தூக்கி வீசப்பட்டு பலத்த காயம் அடைந்த ஜோதி தனது மகன் கண் எதிரே பரிதாபமாக இறந்தார். விக்னேஷ் படுகாயம் அடைந்தார்.

விசாரணை

இந்த விபத்து குறித்து தகவல் அறிந்து சம்பவ இடத்திற்கு வந்த போலீசார் படுகாயம் அடைந்த விக்னேசை மீட்டு சிகிச்சைக்காக தர்மபுரி அரசு மருத்துவமனைக்கு அனுப்பி வைத்தனர். இதையடுத்து பலியான ஜோதியின் உடலை மீட்டு பிரேத பரிசோதனைக்காக தர்மபுரி அரசு மருத்துவமனைக்கு அனுப்பி வைத்தனர்.

இந்த விபத்தால் தர்மபுரி- சேலம் தேசிய நெடுஞ்சாலையில் போக்குவரத்து பாதிப்பு ஏற்பட்டது. இதுகுறித்து தொப்பூர் போலீசார் வழக்குப்பதிவு செய்து விசாரணை நடத்தி வருகின்றனர்.