அரசு பள்ளியில் விபத்தில்லா தீபாவளி விழிப்புணர்வு நிகழ்ச்சி

நாலாட்டின்புத்தூர்:

கழுகுமலை தீயணைப்பு நிலையம் சார்பில் காளாம்பட்டி அரசு மேல்நிலைப்பள்ளியில் தீபாவளி பண்டிகையை முன்னிட்டு விபத்தில்லாமல் தீபாவளி கொண்டாடுவது குறித்த விழிப்புணர்வு நிகழ்ச்சி நடைபெற்றது. கழுகுமலை தீயணைப்பு நிலைய அலுவலர் லிங்கதுரை தலைமை தாங்கினார். பள்ளி தலைமை ஆசிரியர் லதா முன்னிலை வகித்தார். ஆசிரியர் முருகேசன் வரவேற்றார். தொடர்ந்து மாணவ- மாணவிகள் வரும் தீபாவளியன்று பட்டாசுகளை எப்படி பாதுகாப்பாக வெடிக்க வேண்டும் என்றும், பெரிய வெடிகளை வெடிக்கும் போது சிறிது தள்ளி நின்று வெடிக்க வேண்டும். மெல்லிய ஆடைகளை அணிந்து பட்டாசுகளை வெடிக்கக் கூடாது. வெடிகள் வெடிக்கும் போது அருகில் வாளியில் எப்போதும் தண்ணீர் வைத்துக் கொள்ள வேண்டும். கண்களுக்கு அருகில் வைத்து வெடிகளை வெடிக்க கூடாது. காயம் அடைந்தவர்களுக்கு மருத்துவ சிகிச்சை எவ்வாறு அளிப்பது என்பன உள்ளிட்ட பல்வேறு ஆலோசனைகள் மாணவ-மாணவிகளுக்கு வழங்கப்பட்டன. பின்னர் மாணவர்களுக்கு தீயணைப்பு வீரர்கள் செயல்முறை விளக்கம் அளித்தனர். தொடர்ந்து விழிப்புணர்வு துண்டு பிரசுரங்கள் வழங்கப்பட்டது. இதில் ஆசிரியர் செல்லையா மற்றும் மாணவ-மாணவிகள் உள்பட பலர் கலந்து கொண்டனர்.