3½ டன் வேளாண் விளைபொருட்கள் ஏலம்

முத்தூர் ஒழுங்குமுறை விற்பனை கூடத்தில் 3½ டன் வேளாண் விளைபொருட்கள் ஏலம் விடப்பட்டது.

ஒழுங்குமுறை விற்பனை கூடம்

முத்தூர் ஒழுங்குமுறை விற்பனை கூடத்தில் வாரந்தோறும் சனிக்கிழமை தேங்காய், தேங்காய் பருப்பு, எள் ஆகிய வேளாண் விளை பொருட்களின் ஏலம் நடைபெற்றுவருகிறது. இந்த ஏலங்களில் முத்தூர் நகர மற்றும் சுற்றுவட்டார கிராம பகுதி விவசாயிகள் மற்றும் ஈரோடு மாவட்டம் கொல்லன்கோவில், சிவகிரி பேரூராட்சி பகுதிகள், அஞ்சூர் ஊராட்சி மற்றும் கரூர் மாவட்டம் அஞ்சூர், கார்வழி ஊராட்சி பகுதிகளை சேர்ந்த விவசாயிகள் வேளாண் விளை பொருட்களை கொண்டு வந்து விற்று வருகின்றனர்.

இதன்படி நேற்று காலை ஒழுங்குமுறை விற்பனை கூடத்திற்கு சுற்றுவட்டார விவசாயிகள் 5 ஆயிரத்து 291 தேங்காய்களை ஏலத்திற்கு கொண்டு வந்திருந்தனர். இதனை தொடர்ந்து டெண்டர் முறையில் ஏலம் நடைபெற்றது. இதில் ஒரு கிலோ தேங்காய் அதிகபட்ச விலையாக ரூ.24.35-க்கும், குறைந்தபட்ச விலையாக ரூ.19.20-க்கும் ஏலம் விடப்பட்டது.

3½ டன் ஏலம்

மேலும் 44 தேங்காய் பருப்பு மூட்டைகள் ஏலம் விடப்பட்டதில் ஒரு கிலோ தேங்காய் பருப்பு அதிகபட்ச விலையாக ரூ.80.50-க்கும், குறைந்தபட்ச விலையாக ரூ.50.50-க்கும் டெண்டர் முறையில் ஏலம் விடப்பட்டது. மேலும் ஒழுங்குமுறை விற்பனை கூடத்தில் தேங்காய், தேங்காய் பருப்பு, எள் மூட்டைகள் 3½ டன் அளவில் மொத்தம் ரூ‌. 1 லட்சத்து 30 ஆயிரத்து 783-க்கு வேளாண் விளை பொருட்கள் ஏலம் விடப்பட்டது. தொடர் மழை காரணமாக ஒழுங்குமுறை விற்பனை கூடத்திற்கு கடந்த 1 மாத காலமாக தேங்காய் பருப்பு குறைவாககொண்டு வரப்பட்டு ஏலம் விடப்பட்டு வருகிறது என்பது குறிப்பிடத்தக்கது.

இந்த ஏலங்களில் திருப்பூர், ஈரோடு, கரூர் மாவட்டங்களை சேர்ந்த வியாபாரிகள் கலந்து கொண்டனர். இத்தகவலை முத்தூர் ஒழுங்குமுறை விற்பனைக்கூட மேற்பார்வையாளர் கே.தங்கவேல் தெரிவித்து உள்ளார்.