சாலையில் நின்ற யானையால் வாகன ஓட்டிகள் அச்சம்

தேன்கனிக்கேட்டை

அஞ்செட்டியில் சாலையில் நின்ற யானையால் வாகன ஓட்டிகள் அச்சம் அடைந்தனர்.

சாலையில் நின்ற யானை

கிருஷ்ணகிரி மாவட்டம் தேன்கனிக்கோட்டை அருகே உள்ள அஞ்செட்டி வனப்பகுதியில் 50-க்கும் மேற்பட்ட யானைகள் முகாமிட்டுள்ளன. இந்த யானைகள் பல்வேறு குழுக்களாக பிரிந்து சுற்றித்திரிகின்றன. இந்த யானைகள் வனப்பகுதியில் இருந்து வெளியேறி அருகில் உள்ள விவசாய நிலங்களில் புகுந்து பயிர்களை தின்றும், கால்களால் மிதித்தும் அட்டகாசம் செய்து வந்தன.

இந்தநிலையில் நேற்று காலை வனப்பகுதியில் இருந்து வெளியேறிய யானை ஒன்று சாலையின் நடுவில் நின்று இருந்தது. இதனால் அந்த வழியாக சென்ற வாகன ஓட்டிகள் அச்சம் அடைந்தனர். தொடர்ந்து அவர்கள் வாகனங்களை சாலையோரம் ஆங்காங்கே நிறுத்தினர். இதுகுறித்து பொதுமக்கள் வனத்துறையினருக்கு தகவல் தெரிவித்தனர்.

போக்குவரத்து பாதிப்பு

இதையடுத்து வனத்துறையினர் விரைந்து சென்று யானையை வனப்பகுதிக்குள் விரட்டினர். அதன்பின்னர் வாகன ஓட்டிகள் அங்கிருந்து புறப்பட்டு சென்றனர். யானை சாலையில் நீண்ட நேரம் நின்றதால் தேன்கனிக்கோட்டை-அஞ்செட்டி சாலையில் போக்குவரத்து பாதிக்கப்பட்டது. யானை நடமாட்டத்தை தொடர்ந்து வனத்துறையினர் கண்காணித்து வருகின்றனர்.