ஆரணி அருகே மீன்பாடி வண்டி மோதி முதியவர் சாவு

திருவண்ணாமலை மாவட்டம் ஆரணியை அடுத்த ராட்டினமங்கலம் ஈ.பி.நகர் பகுதியில் உள்ள கன்னி கோவில் தெருவை சேர்ந்தவர் முனுசாமி (வயது 70). இவரது மனைவி இந்திராவிற்கு உடல்நிலை சரியில்லாததால் ஆரணி அரசு மருத்துவமனையில் சிகிச்சை பெற்று வருகிறார்.

மனைவியை பார்ப்பதற்காக முனுசாமி சைக்கிளில் ஆற்காடு-ஆரணி நெடுஞ்சாலையில் செல்லும் போது, அந்த வழியாக வந்த மீன்பாடி வண்டி திடீரென சைக்கிள் மீது மோதியது.

இந்த விபத்தில் படுகாயம் அடைந்த முனுசாமி சிகிச்சைக்காக ஆரணி அரசு மருத்துவமனையிலும், பின்னர் அங்கிருந்து மேல் சிகிச்சைக்காக வேலூர் அடுக்கம்பாறை அரசு மருத்துவமனையிலும் சேர்க்கப்பட்டார். ஆனால் அங்கு சிகிச்சை பலனின்றி பரிதாபமாக உயிரிழந்தார்.

இதுகுறித்து புகாரின் பேரில் ஆரணி தாலுகா போலீசார் வழக்குப்பதிவு செய்து விசாரணை நடத்தி வருகின்றனர்.