நிலக்கோட்டை அருகே இருதரப்பினர் மோதல்; 4 பேர் கைது

நிலக்கோட்டை அருகே உள்ள முசுவனூத்துவை சேர்ந்த சிவக்குமார் மகன் ஆதித்தியன் (வயது 22). இவருக்கும், பக்கத்து ஊரான மிளகாய்பட்டியை சேர்ந்த லட்சுமணன் மகன் ரவி என்பவருக்கும் இடையே முன்விரோதம் இருந்து வந்தது.

இந்தநிலையில் நேற்று இரவு ரவி மினிவேனில் பால் கேன்களை ஏற்றுவதற்காக முசுவனூத்து கிராமத்திற்கு சென்றார். அப்போது அங்கு வந்த ஆதித்தியன், அவரது நண்பர் மணிமாறன் (23) ஆகியோர் ரவியிடம் தகராறு செய்து தாக்கியதாக கூறப்படுகிறது. உடனே ரவி தனது நண்பர்களுக்கு செல்போன் மூலம் தகவல் தெரிவித்தார். அதன்பேரில் மிளகாய்பட்டியில் இருந்து ரவியின் நண்பர்களான அர்விஸ், முத்தையா, ராஜா ஆகியோர் அங்கு வந்தனர். அப்போது இருதரப்பினரும் மோதலில் ஈடுபட்டனர்.

இதுகுறித்து தகவல் அறிந்த நிலக்கோட்டை போலீசார் சம்பவ இடத்திற்கு விரைந்து வந்தனர். அப்போது தகராறில் ஈடுபட்டவர்கள் தப்பி ஓட முயன்றனர். அதில், ஆதித்தியன், மணிமாறன், ரவி, அர்விஸ் ஆகியோர் சிக்கினர். இதையடுத்து அவர்கள் 4 பேரையும் போலீசார் கைது செய்தனர். மேலும் தப்பி ஓடிய முத்தையா, ராஜா ஆகியோர் மீது போலீசார் வழக்குப்பதிவு செய்து தேடி வருகின்றனர்.