பெரியகுளம் அருகே பசுமாடுகளை திருடிய 3 பேர் கைது

பெரியகுளம் அருகே உள்ள மேல எண்டப்புளியை சேர்ந்தவர் முருகமலை. இவருக்கு சொந்தமான 4 பசு மாடுகள் கடந்த மாதம் திருடு போயின. இதுகுறித்து அவர் பெரியகுளம் போலீஸ் நிலையத்தில் புகார் அளித்தார். அதன்பேரில் போலீசார் வழக்குப்பதிவு செய்து மாடுகளை திருடிய நபர்களை வலைவீசி தேடி வந்தனர்.

இந்தநிலையில் பெரியகுளம் அருகே உள்ள ஏ.வாடிப்பட்டியை சேர்ந்த பார்த்திபன் (வயது 28), அவரது நண்பர்கள் பாண்டியராஜ் (27), சிவபிரகாஷ் (24) ஆகிய 3 பேரும் சேர்ந்து முருகமலையின் பசுமாடுகளை திருடியது தெரியவந்தது. இதையடுத்து அவர்கள் 3 பேரையும் போலீசார் கைது செய்தனர். மேலும் அவர்களிடம் இருந்து 2 பசுமாடுகள் மீட்கப்பட்டது.