மளிகை கடையில் திருட முயன்ற சிறுவன் உள்பட 2 பேர் கைது

பனமரத்துப்பட்டி

பனமரத்துப்பட்டி அருகே உள்ள பெரமனூர் பகுதியை சேர்ந்தவர் மோகனா (வயது 50). இவர் பனமரத்துப்பட்டி காந்தி நகர் பகுதியில் மளிகை கடை வைத்துள்ளார். சம்பவத்தன்று இவர் கடையை பூட்டி விட்டு வீட்டுக்கு சென்று விட்டார். நள்ளிரவு மளிகை கடையில் இருந்து சத்தம் கேட்டுள்ளது. இதனால் அக்கம் பக்கத்தினர் வெளியே வந்து பார்த்தனர். அப்போது 2 பேர் மளிகை கடையின் பூட்டை உடைத்து திருட முயன்றது தெரியவந்தது. இதையடுத்து அவர்கள் அந்த நபர்களை பிடித்து தர்ம அடி கொடுத்தனர். இதுகுறித்து அவர்கள் பனமரத்துப்பட்டி போலீசாருக்கு தகவல் தெரிவித்தனர். அதன்பேரில் போலீசார் விரைந்து சென்று, அந்த நபர்களிடம் விசாரணை நடத்தினர். அதில் அவர்கள் எஸ்.ஆட்டையாம்பட்டி ஆதிதிராவிடர் தெருவை சேர்ந்த மாயக்கண்ணன் என்பவர் மகன் குப்புதாஸ் (19), அதேபகுதியை சேர்ந்த 17 வயது சிறுவன் என்பது தெரியவந்தது. இதனையடுத்து போலீசார் அவர்கள் 2 பேரையும் கைது செய்தனர்.