ஓசூரில் கஞ்சா சாக்லெட்டுகள் விற்ற வாலிபர் கைது

ஓசூர்

ஓசூரில் கஞ்சா சாக்லெட்டுகள் விற்ற வாலிபரை போலீசார் கைது செய்தனர்.

போலீசார் ரோந்து

கிருஷ்ணகிரி மாவட்டத்தில் கஞ்சா விற்பனையை தடுக்க போலீசார் தீவிர ரோந்து சென்று கண்காணித்து வருகின்றனர். ஓசூர் டவுன் போலீசார் கும்பாரப்பேட்டை பகுதியில் ரோந்து சென்றனர். அங்கு சந்தேகத்திற்கு இடமளிக்கும் வகையில் நின்ற வாலிபரை பிடித்து போலீசார் சோதனை செய்தனர்.

அப்போது அவர் கையில் 300 கிராம் அளவிற்கு கஞ்சா சாக்லெட்டுகள் விற்பனைக்காக வைத்திருந்தது தெரிய வந்தது. தொடர்ந்து அவரிடம் போலீசார் விசாரணை நடத்தினர். அவர் ஓசூர் பாகலூர் சாலை கே.சி.சி. நகரை சேர்ந்த பிரதீப் மெய்லி (வயது27) என்பது தெரியவந்தது. இதையடுத்து அவரை போலீசார் கைது செய்தனர். மேலும் கஞ்சா சாக்லெட்டுகளை பறிமுதல் செய்தனர்.

கஞ்சா விற்பனை

ஊத்தங்கரை அருகே கதவணை பகுதியில் ஊத்தங்கரை போலீசார் ரோந்து சென்றனர். அங்கு சந்தேகத்திற்கு இடமாக நின்ற நபரை பிடித்து போலீசார் சோதனை செய்தனர். அப்போது அவர் கஞ்சா விற்பனைக்காக வைத்திருந்தது தெரிய வந்தது. இதுகுறித்து போலீசார் அவரிடம் விசாரணை நடத்தினர். அவர் அதேபகுதியை சேர்ந்த பூவரசன் (21) என தெரிய வந்தது. இதையடுத்து அவரை போலீசார் கைது செய்தனர். மேலும் கஞ்சாவும் பறிமுதல் செய்யப்பட்டது.