பாலியல் கொடுமை நடந்த ஆசிரம நிர்வாகி கைது

விழுப்புரம்,

விழுப்புரம் மாவட்டம் விக்கிரவாண்டி அருகே உள்ள குண்டலப்புலியூரில் அன்புஜோதி ஆசிரமம் உள்ளது. இதனை கேரள மாநிலத்தை சேர்ந்த ஜூபின்பேபி (வயது 45) என்பவர் நடத்தி வருகிறார். அங்கு மனநலம் பாதிக்கப்பட்டவர்கள், ஆதரவற்றோர் தங்க வைக்கப்பட்டுள்ளனர்.

அரசு அதிகாரிகள், போலீசார் அங்கு நடத்திய விசாரணையில், உரிய அனுமதியின்றி ஆசிரமம் நடைபெற்று வந்ததும், ஆசிரமத்தில் பராமரிக்கப்பட்டு வருபவர்களை அடித்து துன்புறுத்தியதோடு, பெண்களை பாலியல் வன்கொடுமை செய்ததும், ஆசிரமத்தில் இருந்த 16 பேர் மாயமாகியிருப்பதும், அடுத்தடுத்து பல திடுக்கிடும் தகவல்களும் அம்பலமானது.

இதையடுத்து ஆசிரமத்தில் தங்கியிருந்த 141 பேர் மீட்கப்பட்டுள்ளனர். இவர்களுக்கு முண்டியம்பாக்கம் அரசு மருத்துவக்கல்லூரி ஆஸ்பத்திரியில் உரிய சிகிச்சை அளித்து திருவண்ணாமலை, கள்ளக்குறிச்சி, கடலூர் உள்ளிட்ட பல்வேறு இடங்களில் உள்ள அரசு காப்பகங்களுக்கு அனுப்பி வைக்கப்பட்டுள்ளனர்.

மேலும், அன்புஜோதி ஆசிரமத்தை மூடி சீல் வைக்கவும் மாவட்ட நிர்வாகம் சார்பில் நடவடிக்கை மேற்கொள்ளப்பட்டு வருகிறது.

8 பேர் கைது

இதுதொடர்பாக கெடார் போலீசார் வழக்குப்பதிவு செய்து ஆசிரம நிர்வாகி ஜூபின்பேபியின் மனைவி மரியா ஜூபின், கேரள மாநிலம் வயநாடு மாவட்டம் சுல்தான்பத்தேரியை சேர்ந்த ஆசிரம மேலாளரான பிஜூமோகன், ஆசிரம பணியாளர்களான விழுப்புரம் அயினம்பாளையத்தை சேர்ந்த பூபாலன், தென்காசி மாவட்டம் சிவகிரி தாலுகா நாராயணபுரத்தை சேர்ந்த முத்துமாரி, விக்கிரவாண்டி அருகே விநாயகபுரத்தை சேர்ந்த கோபிநாத், நரசிங்கனூரை சேர்ந்த அய்யப்பன், கேரள மாநிலம் பாலக்காட்டை சேர்ந்த தாஸ், தெலுங்கானாவை சேர்ந்த சதீஷ் ஆகிய 8 பேரை கைது செய்து கடலூர் மத்திய சிறையில் அடைத்தனர்.

இதில் முக்கிய குற்றவாளியாக கருதப்படும் ஆசிரம நிர்வாகியான ஜூபின்பேபி, தன்னை குரங்குகள் கடித்ததால் காயமடைந்ததாக கூறி முண்டியம்பாக்கத்தில் உள்ள அரசு மருத்துவக் கல்லூரி ஆஸ்பத்திரியில் சிகிச்சை பெற்று வந்தார். இதனால் அவரை கைது செய்ய முடியாத நிலை ஏற்பட்டது.

ஆஸ்பத்திரிக்கு சென்று நீதிபதி விசாரணை

இந்நிலையில் ஜூபின்பேபியை விரைந்து கைது செய்யவும் போலீசார் முடிவு செய்தனர். இதற்காக போலீசாரின் அழைப்பை ஏற்று விழுப்புரம் 2-வது குற்றவியல் நீதித்துறை நடுவர் நீதிமன்ற மாஜிஸ்திரேட்டு அகிலா நேற்று அதிகாலை 4 மணியளவில் முண்டியம்பாக்கம் அரசு மருத்துவக்கல்லூரி ஆஸ்பத்திரிக்கு நேரில் சென்றார். அங்கு சிகிச்சை பெற்று வரும் ஆசிரம நிர்வாகி ஜூபின்பேபியிடம், அவர் மீது சுமத்தப்பட்டுள்ள புகார்கள் குறித்து சுமார் அரை மணி நேரம் விசாரணை நடத்தினார். பின்னர் ஜூபின்பேபியை வருகிற மார்ச் 2-ந்தேதி வரை 15 நாட்கள் நீதிமன்ற காவலில் வைக்கும்படி நீதிபதி அகிலா உத்தரவிட்டார்.

ஆசிரம நிர்வாகி கைது

இதனைத்தொடர்ந்து ஜூபின்பேபியை போலீசார் கைது செய்தனர். அவருக்கு இன்னும் சிகிச்சை அளிக்க வேண்டியுள்ளதாக அங்குள்ள டாக்டர்கள் அறிவுறுத்தியதால் ஜூபின்பேபியை பலத்த போலீஸ் பாதுகாப்புடன் ஆஸ்பத்திரியிலேயே வைத்து தொடர்ந்து சிகிச்சை அளிக்க ஏற்பாடு செய்யப்பட்டுள்ளது. அவர் சிகிச்சை முடிந்து ஆஸ்பத்திரியில் இருந்து டிஸ்சார்ஜ் செய்யப்பட்டதும் அவரை கடலூர் மத்திய சிறையில் அடைக்க போலீசார் திட்டமிட்டுள்ளனர்.

மிகவும் பரபரப்பாக பேசப்பட்டு வரும் இச்சம்பவத்தில் ஆசிரமத்தின் நிர்வாகி ஜூபின்பேபி தற்போது கைது செய்யப்பட்டுள்ளார். அவரை நீதிமன்றத்தின் அனுமதி பெற்று போலீஸ் காவலில் எடுத்து விசாரிக்க போலீசார் முடிவு செய்துள்ளனர். அவ்வாறு விசாரித்தால்தான் ஆசிரமத்தை பற்றி எழுந்துள்ள பரபரப்பான புகார்கள், திடுக்கிடும் தகவல்களின் பின்னணி பற்றிய முழு விவரமும் தெரியவரும்.

16 பேரின் கதி என்ன?

அன்புஜோதி ஆசிரமத்தில் திருப்பூரை சேர்ந்த ஜாபருல்லா என்பவர் மாயமானதால் அவரை கண்டுபிடித்து தருமாறு அவரது உறவினர் ஹனிதீன், சென்னை ஐகோர்ட்டில் ஆட்கொணர்வு மனுதாக்கல் செய்தார். இதையடுத்து ஐகோர்ட்டு உத்தரவுப்படி அரசு அதிகாரிகள் மற்றும் போலீசார், அன்புஜோதி ஆசிரமத்தில் அதிரடி சோதனை நடத்திய பிறகே அங்கு நடந்த உண்மைகள் வெளிச்சத்துக்கு வந்துள்ளது. விசாரணையில், ஜாபருல்லா உள்பட 50 பேரை பெங்களூரு அருகே தொட்டக்குப்பியில் உள்ள ஜூபின்பேபியின் நண்பருக்கு சொந்தமான ஆசிரமத்தில் சேர்த்ததாகவும், அங்கிருந்து 16 பேர், தப்பிச்சென்று விட்டதாகவும் குண்டலப்புலியூர் ஆசிரம நிர்வாகம் தெரிவித்தது.

இதுதொடர்பாக விசாரிக்க செஞ்சி துணை போலீஸ் சூப்பிரண்டு பிரியதர்ஷினி தலைமையிலான 5 போலீசார் கொண்ட தனிப்படையினர் நேற்று விழுப்புரத்தில் இருந்து பெங்களூருவுக்கு காரில் புறப்பட்டனர். தொட்டக்குப்பியில் உள்ள அந்த ஆசிரமத்தில் உள்ளூர் போலீஸ் உதவியுடன், தனிப்படை போலீசார் விசாரணையை தொடங்கினர். ஜூபின்பேபி உண்மையிலேயே குண்டலப்புலியூரில் இருந்து 50 பேரை அழைத்துச்சென்று விட்டாரா?, இதில் 16 பேர் மாயமானார்களா?, அவர்கள் தற்போது எங்கு உள்ளனர்?, அவர்களின் கதி என்ன? என்பது குறித்து விசாரணை நடத்தி வருகிறார்கள்.