தொழிலாளி மீது தாக்குதல்; வாலிபர் கைது

வடமதுரை அருகே உள்ள தென்னம்பட்டி வடக்கு தெருவை சேர்ந்தவர் ராஜசேகர் (வயது 35), கூலித்தொழிலாளி. இவருக்கும் அதே பகுதியை சேர்ந்த சரவணகுமார் (28) என்பவருக்கும் தென்னை ஓலையால் குளியலறை அமைத்தது தொடர்பாக முன்விரோதம் இருந்து வந்துள்ளது. இந்தநிலையில் நேற்று முன்தினம் சரவணகுமார் மற்றும் அவருடைய அண்ணன் மணிகண்டன் (30) ஆகிய இருவரும் சேர்ந்து ராஜசேகரிடம் தகராறு செய்தனர். தகராறு முற்றிய நிலையில் ஆத்திரமடைந்த அவர்கள், ராஜசேகரை கல்லால் தலையில் தாக்கியுள்ளனர்.

இதைப்பார்த்த ராஜசேகரின் தந்தை மூக்கன் அவர்களை தடுக்க முயன்றபோது அவரையும் கம்பால் தாக்கி கொலை மிரட்டல் விடுத்ததாக கூறப்படுகிறது. இதில் காயமடைந்த ராஜசேகர் திண்டுக்கல் அரசு மருத்துவமனையில் சிகிச்சைக்கு சேர்க்கப்பட்டுள்ளார். இந்த சம்பவம் குறித்து ராஜசேகர் கொடுத்த புகாரின் பேரில் சரவணகுமார், மணிகண்டன் ஆகியோர் மீது வடமதுரை போலீஸ் சப்-இன்ஸ்பெக்டர் கிருஷ்ணவேணி மற்றும் போலீசார் வழக்குப்பதிவு செய்து மணிகண்டனை கைது செய்தனர். மேலும் தலைமறைவான சரவணக்குமாரை வலைவீசி தேடி வருகின்றனர்.