திருச்செந்தூர் ஆதித்தனார் கல்லூரியில் பொருளியல் மன்ற கலை இலக்கிய போட்டிகள்

திருச்செந்தூர்:

திருச்செந்தூர் ஆதித்தனார் கல்லூரியில் பொருளியல் துறை மற்றும் சமூகரெங்கபுரம் பைன்டெக் நிறுவனம் சார்பில் பொருளியல் மன்ற கலை இலக்கியவிழா போட்டிகள் நடந்தது. போட்டிகளை பொருளியல்துறை தலைவர் சி.ரமேஷ் தொடங்கி வைத்தார். இதில் பொருளியல் துறையை சேர்ந்த மாணவ, மாணவிகள் 250 பேர் கலந்து கொண்டனர். வினாடி-வினா, கட்டுரை, பேச்சு, குழு நடனம், கழிவுகளிலிருந்து கலை, அடுப்பில்லா சமையல் மற்றும் பாட்டு போட்டிகள் நடத்தப்பட்டது. ஒவ்வொரு போட்டியிலும் முதல் 3 பேருக்கு பரிசுகள் வழங்கப்பட்டது. வினாடி-வினா போட்டியில் இளங்கலை 3-ம் ஆண்டு பொருளியல்துறை மாணவர்களான செல்வம், ஞானஅபினாஷ் ஆகியோர் முதல் பரிசு பெற்றனர். கட்டுரை போட்டியில் எம்.பில். மாணவி சன்மதி முதல்பரிசையும், பேச்சு போட்டியில் 3-ம் ஆண்டு பொருளியல் மாணவர் செல்வம் முதல் பரிசையும், கழிவுகளில் இருந்து கலை போட்டியில் முதலாம் ஆண்டு முதுகலை மாணவி வேலம்மாள் என்ற பொன்திவ்யா முதல் பரிசையும் பெற்றனர். குழு நடனத்தில் இளங்கலை பொருளியல் 3-ம் ஆண்டு மாணவர்கள் முதல் பரிசையும், பாட்டு போட்டியில் எம்.பில் மாணவி சன்மதி முதல் பரிசையும், அடுப்பில்லா சமையல் போட்டியில் முதுகலை 2-ம் ஆண்டு பொருளியல் மாணவர்கள் சுந்தர்ராஜ், ஆகாஷ் ஆகியோர் முதல் பரிசையும் பெற்றனர். போட்டிகளுக்கு நடுவர்களாக பேராசிரியர்கள் முத்துக்குமார், மாலைசூடும் பெருமாள், கணேசன், உமா ஜெயந்தி ஆகியோர் செயல்பட்டனர்.

பரிசளிப்பு விழாவிற்கு கல்லூரி முதல்வர் து.சி.மகேந்திரன் தலைமை தாங்கினார். விழா அமைப்பாளர் உதவி பேராசிரியர் ச.சிவமுருகன் வரவேற்று பேசினார். தமிழ்த்துறை தலைவர் கு.கதிரேசன் சிறப்பு விருந்தினராக கலந்து கொண்டு பேசினாா். போட்டியில் வெற்றிபெற்ற மாணவ, மாணவிகளுக்கு முதல்வர்,சிறப்பு விருந்தினர் ஆகியோர் பரிசுகள் வழங்கினர். உதவி பேராசிரியர் பே.மருதையா பாண்டியன் சிறப்பு விருந்தினரை அறிமுகம் செய்து பேசினார். உதவிப் பேராசிரியர் சி.முருகேஸ்வரி நன்றி கூறினார். உதவி பேராசிரியர் வீ.சிவஇளங்கோ நிகழ்ச்சியை தொகுத்து வழங்கினார். விழா ஏற்பாடுகளை பேராசிரியர்கள் அசோகன், பிரியதர்ஷினி, மாணவர் செயலர்கள் ஜெப்ரின் ஆகாஷ், முகுந்தன் ஆகியோர் செய்திருந்தனர்.