தங்கையின் தோழிக்கு குளிர்பானத்தில் மதுவை கலந்து கொடுத்து பலாத்கார முயற்சி; டிரைவர் கைது

புதுக்கோட்டை மாவட்டம் கீரனூர் அருகே உள்ள சூசைப்புடையான்பட்டியை சேர்ந்தவர் சிவா (வயது 28), டிரைவர். இவருக்கு திருமணமாகி 2 குழந்தைகள் உள்ளனர். இந்தநிலையில் இவரது தங்கையின் திருமணம் நேற்று முன்தினம் நடந்தது. திருமண நிகழ்ச்சியில் கலந்து கொள்வதற்காக மணப்பெண்ணின் தோழி கரூரை சேர்ந்த 19 வயது பெண் வந்திருந்தார்.

அவரது அழகில் மயங்கிய சிவா அந்த பெண்ணுக்கு குளிர்பானத்தில் மதுவை (பீர்) கலந்து கொடுத்துள்ளார். சற்று நேரத்தில் போதை தலைக்கேறியதும் மயங்கிய அந்த இளம்பெண்ணை மறைவாக உள்ள ஒரு வீட்டுக்கு அழைத்து சென்று பாலியல் பலாத்காரம் செய்ய முயன்றுள்ளார். மயக்கம் தெளிந்த அந்த இளம்பெண் பதற்றத்துடன் சிவாவின் பிடியிலிருந்து தப்பி வந்து உறவினர்களிடம் நடந்த சம்பவத்தை கூறியுள்ளார். இதையடுத்து அவர்கள் கீரனூர் அனைத்து மகளிர் போலீஸ் நிலையத்தில் புகார் கொடுத்தனர். புகாரின் பேரில் இன்ஸ்பெக்டர் லதா தலைமையிலான போலீசார் சம்பவ இடத்திற்கு விரைந்து சென்று விசாரணை நடத்தினர். பின்னம் இளம்பெண்ணை பாலியல் பலாத்காரம் செய்ய முயன்றதாக சிவா மீது வழக்குப்பதிவு செய்து அவரை கைது செய்து புதுக்கோட்டை சிறையில் அடைத்தனர்.

திருமண நிகழ்ச்சிக்கு வந்த இளம்பெண்ணை பாலியல் பலாத்காரம் செய்ய முயன்ற சம்பவம் அப்பகுதியில் பெரும் பரபரப்பை ஏற்படுத்தியது.