தூங்கிக்கொண்டிருந்த பெண்ணிடம் நகை பறிக்க முயற்சி

அண்ணாமலை நகர்:

சிதம்பரம் அருகே டி.எஸ்.பேட்டை குட்டைக்கார தெருவை சேர்ந்தவர் கலியமூர்த்தி. இவரது மனைவி சுதா (வயது 40). இவர் கடந்த 23-ம் தேதி இரவு தனது குடும்பத்தினருடன் வீட்டில் தூங்கிக் கொண்டிருந்தார். அப்போது நள்ளிரவில் வீட்டின் பின்பக்கமாக வந்த மர்மநபர்கள், அங்கிருந்த ஜன்னல் வழியாக கம்பி மூலம் கதவை திறந்து உள்ளே புகுந்தனர்.

பின்னர் அவர்கள் அங்கு அலமாரியில் இருந்த ரூ.2 ஆயிரத்தை திருடினர். தொடர்ந்து அவர்கள் அங்கு தூங்கிக் கொண்டிருந்த சுதாவின் கழுத்தில் கிடந்த நகையை பறிக்க முயன்றனர். இதில் சுதாரித்து கொண்ட அவர் திருடன், திருடன் என கூச்சலிட்டார். இதைகேட்டு எழுந்த சுதாவின் குடும்பத்தினர் அக்கம் பக்கத்தினர் உதவியுடன், மர்மநபர்கள் 3 பேரையும் மடக்கிபிடித்து அண்ணாமலைநகர் போலீசில் ஒப்படைத்தனர்.

இதையடுத்து அவர்களிடம் போலீசார் விசாரணை நடத்தினர். விசாரணையில் அவர்கள் சிதம்பரம் மெய்க்காவல் தெருவை சேர்ந்த மணிகண்டன் (24), ஜம்பு குளம் பகுதியை சேர்ந்த நிலவுதேவன் (19), டி.எஸ். பேட்டை, சுனாமி நகர் பகுதியை சேர்ந்த கார்த்தி (26) ஆகியோர் என்பதும் தெரிந்தது. இதையடுத்து மணிகண்டன் உள்பட 3 பேரையும் போலீசார் கைது செய்தனர்.