பெண்ணிடம் தவறாக நடக்க முயன்ற ஆட்டோ டிரைவர்

திருவண்ணாமலையில் விறகு எடுத்து கொண்டிருந்த பெண்ணிடம் ஆட்டோ டிரைவர் தவறாக நடக்க முயன்றார். அந்த பெண் சத்தம் போட்டதால் கழுத்தை அறுத்துவிட்டு தப்பி ஓடிவிட்டார். பின்னர் அவரை போலீசார் கைது செய்தனர்.

ஆட்டோ டிரைவர்

கள்ளக்குறிச்சி மாவட்டம் மணலூர்பேட்டையை சேர்ந்தவர் சிவன் (வயது 33). இவர் திருவண்ணாமலையில் தங்கி ஆட்டோ ஓட்டி வருகிறார்.

இன்று மதியம் இவர் நல்லவன்பாளையம் அருகே சமுத்திரம் ஏரிக்கரை பகுதிக்கு இயற்கை உபாதைக்காக ஒதுங்கினார். அப்போது அந்த பகுதியில் பெண் ஒருவர் தனியாக விறகு எடுத்துக் கொண்டிருந்தார்.

சுற்றிலும் ஆட்கள் யாரும் இல்லாததால் அதனை பயன்படுத்தி கொண்ட சிவன் அந்த பெண்ணிடம் தவறாக நடக்க முயன்றார். இதனால் அதிர்ச்சி அடைந்த அந்த பெண் சத்தம் போட்டார்.

சத்தம் கேட்டு அக்கம்பக்கத்தினர் ஓடி வருவதை கண்டு அவர் கையில் வைத்திருந்த சின்ன கத்தியால் பெண்ணின் கழுத்தை அறுத்துவிட்டு தப்பி ஓடினார்.

சத்தம் கேட்டு வந்த அக்கம்பக்கத்தினர் காயம் அடைந்த பெண்ணை மீட்டு திருவண்ணாமலை அரசு மருத்துவமனைக்கு சிகிச்சைக்காக கொண்டு சென்றனர்.

கைது

சிலர் தப்பியோடிய ஆட்டோ டிரைவரை துரத்தி சென்றனர். இதற்கிடையில் ஆட்டோவில் பெட்ரோல் தீர்ந்து விடவே சிவன் ஆட்டோவை சிறிது தூரம் தள்ளிக் கொண்டே சென்றார்.

பின்னர் ஆட்டோவில் வைத்திருந்த கேனில் இருந்த பெட்ரோலை எடுத்து ஊற்றிக் கொண்டு தப்பித்து செல்ல முயன்றார்.

சுமார் 3 கிலோ மீட்டருக்கு மேல் அவரை விரட்டி சென்றவர்கள் தேனி மலைப்பகுதியில் மடக்கிப் பிடித்தனர். அப்போது சிவன் மதுபோதையில் இருந்ததாக கூறப்படுகிறது. இதையடுத்து அவர்கள் சிவனை திருவண்ணாமலை தாலுகா போலீசில் ஒப்படைத்தனர்.

இதுகுறித்து போலீசார் வழக்குப்பதிவு செய்து சிவனை கைது செய்தனர்.

மேலும் மருத்துவமனையில் பாதிக்கப்பட்ட பெண்ணுக்கு தொடர்ந்து சிகிச்சை அளிக்கப்பட்டு வருகிறது.

பட்டப் பகலில் போதையில் பெண்ணிடம் தவறாக நடக்க முயற்சித்து அந்த பெண்ணை கழுத்தை அறுக்கும் அளவிற்கு ஆட்டோ டிரைவர் சென்ற சம்பவம் திருவண்ணாமலையில் பெரும் பரபரப்பை ஏற்படுத்தி உள்ளது.