விபத்தில்லா தீபாவளி கொண்டாடுவது குறித்து விழிப்புணர்வு

சங்கராபுரம்

சங்கராபுரம் தீயணைப்பு நிலையத்தின் சார்பில் விபத்தில்லா தீபாவளி கொண்டாடுவது குறித்த விழிப்புணர்வு நிகழ்ச்சி சங்கராபுரம் அரசு பெண்கள் மேல்நிலைப்பள்ளியில் நடைபெற்றது. இதற்கு நிலைய அலுவலர் ஜெயேந்திரன் தலைமை தாங்கினார். தலைமை ஆசிரியர் வனிதாகுமாரி, உதவி தலைமை ஆசிரியர் ராமசாமி ஆகியோர் முன்னிலை வகித்தனர். இதில் பட்டாசு வெடிக்கும் போது நீளமான ஊதுபத்தி பயன்படுத்த வேண்டும், கால்களில் காலணிகள் அணிந்திருக்கவேண்டும், ராக்கெட் வெடிகளை பாட்டிலில் வைத்து வெடிக்ககூடாது. குடிசை பகுதிகளில் பட்டாசு வெடிப்பதை தவிர்க்கவேண்டும். பட்டாசு வெடிக்கும் போது பருத்தி ஆடைகளை அணிய வேண்டும். வெடிக்காத பட்டாசுகளை கைகளால் தொடக்கூடாது. அருகில் வாளியில் தண்ணீர் வைத்திருக்க வேண்டும் என்பது குறித்து மாணவிகளுக்கு விழிப்புணர்வு ஏற்படுத்தப்பட்டது. மேலும் தீ விபத்து மற்றும் பேரிடர் காலங்களில் எவ்வாறு பொதுமக்களை காப்பாற்றுவது என்பது குறித்த செயல் விளக்கம் மற்றும் ஒத்திகை நிகழ்ச்சி நடைபெற்றது. இதில் முன்னணி தீயணைப்பு வீரர்கள் சிவகுமார், சுப்பிரமணியன் மற்றும் ஆசிரியர்கள், மாணவிகள் கலந்து கொண்டனர்.