போக்குவரத்து விதிமுறைகள் குறித்து வாகன ஓட்டிகளுக்கு விழிப்புணர்வு

வாகன ஓட்டிகளிடம் போக்குவரத்து விதிகளை பின்பற்றுவது பற்றியும், ஹெல்மெட், 'சீட் பெல்ட்' ஆகியவை அணிவதால் விபத்துகளின்போது உயிரிழப்புகள் பெரிதும் குறைக்கப்படுவது குறித்தும், சாலைகளில் வாகனங்களை மெதுவாக இயக்குவதால் விபத்துகளை தவிர்ப்பது குறித்தும் விழிப்புணர்வு ஏற்படுத்தும் நிகழ்ச்சி நடந்தது. பெரம்பலூர் மாவட்ட போலீஸ் சூப்பிரண்டு ஷ்யாம்ளா தேவி உத்தரவின்பேரில் பெரம்பலூர் உட்கோட்ட துணை சூப்பிரண்டு பழனிச்சாமி வழிகாட்டுதலின்படி நெடுஞ்சாலை போக்குவரத்து போலீஸ் இன்ஸ்பெக்டர் சுப்பையன் தலைமையில் போக்குவரத்து போலீசார், வாகன ஓட்டிகளிடம் விழிப்புணர்வு ஏற்படுத்தினர். மேலும் பெற்றோர்கள் ஓட்டுனர் உரிமம் பெற்ற தங்களது பிள்ளைகள் வீட்டை விட்டு வெளியே செல்லும்போது, சாலை விதிகளை பின்பற்றி பயணம் செய்ய அறிவுரை வழங்கி, பாதுகாப்பான பயணத்தை மேற்கொள்ளுமாறு அறிவுறுத்துமாறும், சாலை விதிகளை கடைபிடிப்பதன் முக்கியத்துவம் குறித்து அவர்களிடம் தெரிவிக்குமாறும் போலீசார் விழிப்புணர்வு ஏற்படுத்தினர்.