ரெயில்வே மேம்பாலத்தில் கார் மோதி அய்யப்ப பக்தர் சாவு

ஆந்திர மாநிலம் அனந்தபூர் கக்கல்பள்ளி பகுதியை சேர்ந்தவர் சீனிவாசலு (வயது 37). இவர் தனது உறவினர்களான அதே பகுதியை சேர்ந்த சுப்புராயலு (41) உள்ளிட்ட 10 பேருடன் காரில் சபரிமலைக்கு சென்றுவிட்டு கடந்த 22-ந்தேதி ஊர் திரும்பினர். அந்த கார் கன்னியாகுமரி- மதுரை நான்குவழி சாலையில் நெல்லை டி.வி.எஸ். நகர் ரெயில்வே மேம்பாலத்தில் சென்ற போது டிரைவர் கட்டுப்பாட்டை இழந்து பாலத்தின் தடுப்பு சுவரில் மோதி விபத்தில் சிக்கியது. இதில் காரில் இருந்த அய்யப்ப பக்தர்கள் 10 பேர் காயம் அடைந்தனர்.

அவர்களுக்கு பாளையங்கோட்டை ஐகிரவுண்டு அரசு ஆஸ்பத்திரியில் சிகிச்சை அளிக்கப்பட்டு வந்தது. இந்த நிலையில் தீவிர சிகிச்சையில் இருந்த சுப்புராயலு நேற்று முன்தினம் இரவு உயிர் இழந்தார். இந்த சம்பவம் குறித்து மாநகர போக்குவரத்து புலனாய்வு பிரிவு போலீசார் வழக்குப்பதிவு செய்து விசாரணை நடத்தி வருகின்றனர்.