பஸ்-மொபட் மோதல்; வங்கி ஊழியர் பலி

பழனி ராஜாநகரை சேர்ந்தவர் முத்து (வயது 75). ஓய்வுபெற்ற வங்கி ஊழியர். நேற்று முன்தினம் காலை இவர், தனது மொபட்டில் உழவர் சந்தைக்கு சென்றார். பின்னர் காய்கறிகளை வாங்கிக்கொண்டு வீட்டுக்கு திரும்பி வந்துகொண்டிருந்தார்.

அப்போது பழனியில் இருந்து திண்டுக்கல் நோக்கி சென்ற தனியார் பஸ், எதிர்பாராதவிதமாக இவர் சென்ற மொபட்டில் மோதியது. இதில் தூக்கி வீசப்பட்ட முத்து படுகாயமடைந்தார். அருகில் உள்ளவர்கள் அவரை மீட்டு சிகிச்சைக்காக பழனி அரசு மருத்துவமனையில் சேர்த்தனர்.

பின்னர் மேல் சிகிச்சைக்காக மதுரை அரசு மருத்துவமனைக்கு அவர் கொண்டு செல்லப்பட்டார். ஆனால் அங்கு சிகிச்சை பலனின்றி முத்து பரிதாபமாக இறந்தார். இதுகுறித்து பழனி டவுன் போலீசார் வழக்குப்பதிவு செய்து விசாரணை நடத்தி வருகின்றனர்.