மகளிர் உரிமைத்தொகையை வங்கிகள் பிடித்தம் செய்யக்கூடாது: அமைச்சர் தங்கம் தென்னரசு அறிக்கை

சென்னை,

முன்னாள் முதல்-அமைச்சர் அறிஞர் அண்ணாவின் 115-வது பிறந்தநாளான செப்டம்பர் 15 அன்று குடும்பத்தலைவிகளுக்கு மாதம் தலா ரூ.1,000 வழங்கும் கலைஞர் மகளிர் உரிமைத்தொகை திட்டத்தை முதல்-அமைச்சர் மு.க.ஸ்டாலின் முறைப்படி தொடங்கி வைத்தார். இந்த திட்டத்தை பிற மாவட்டங்களில் அந்தந்த மாவட்ட அமைச்சர்கள் தொடங்கி வைத்தனர்.

இதனிடையே, குறைந்த பட்ச இருப்பு இல்லை, குறுஞ்செய்திக் கட்டணம் ஆகிய காரணங்களுக்காக, கணிசமான எண்ணிக்கையிலான பெண்களின் கணக்குகளிலிருந்து அவர்களுக்கு சேர வேண்டிய ஆயிரம் ரூபாயில் பெரும்பாலான தொகையினை வங்கிகள் பிடித்தம் செய்தன. இதனால், மகளிர் உரிமைத்தொகையை வங்கியில் இருந்து எடுக்க முடியாமல் சிலர் சிரமப்பட்டனர்.

இதனை தொடர்ந்து, மகளிர் உரிமைத்தொகையினை குறைந்தபட்ச இருப்பு இல்லை என்றும், பிற காரணங்களுக்காகவும் வங்கிகள் பிடித்தம் செய்யக்கூடாது என அரசுக்கு கோரிக்கை வைக்கப்பட்டது.

இந்த நிலையில், கலைஞர் மகளிர் உரிமைத்தொகையை தங்களது நிர்வாகக் காரணங்களுக்காக வங்கிகள் பிடித்தம் செய்யக்கூடாது என தமிழக அரசு தெரிவித்துள்ளது. இது தொடர்பாக தமிழக நிதி அமைச்சர் தங்கம் தென்னரசு அறிக்கையின் வாயிலாக கூறி இருப்பதாவது;

"கலைஞர் மகளிர் உரிமைத் திட்டத்தில் மகளிர் உரிமை தொகை வழங்கும் நிகழ்வை செப்டம்பர் 15-ந்தேதி முதல்-அமைச்சர் தொடங்கிவைத்தார். திட்டத் தொடக்கத்தின் முதல் நாளே ஒரு கோடிக்கும் மேற்பட்ட மகளிரின் வங்கிக்கணக்கில் உரிமைத்தொகை வரவுவைக்கப்பட்டது ஒரு மகத்தான சாதனை நிகழ்வாகும் இதுகுறித்து நாடே பாராட்டுகிறது.

இந்நிலையில், ஆங்காங்கே சில குறைபாடுகள் அரசின் கவனத்திற்கு வந்துள்ளன. மகளிரின் வங்கி கணக்கில் வரவு வைக்கப்பட்ட உரிமை தொகையை வங்கிக்கான சேவை கட்டணம், ஏற்கெனவே வாங்கிய கடன் ஆகியவற்றுக்கு சில வங்கிகள் நேர் செய்துகொள்வதாக புகார்கள் வரப்பெற்றுள்ளன. இது மிகவும் வருந்தத்தக்க நிகழ்வாகும். இதுகுறித்து மாநில வங்கிகள் குழுமத்தின் கூட்டத்தில் தமிழ்நாடு அரசின் சார்பில் வழங்கப்படும் உரிமைத் தொகையை வங்கிகள் பிடித்தம் செய்யக்கூடாது என்று அறிவுறுத்தப்பட்டுள்ளது.

இருப்பினும் சில வங்கிகளில் இந்த அறுவுறுத்தல் பின்பற்றப்படவில்லை என்பது ஏற்கத்தக்கதல்ல. தமிழ்நாடு அரசு வழங்கும் மகளிர் உரிமைத் தொகையை வங்கிகள் தங்களது நிர்வாக செலவினங்களுக்கு நேர் செய்யக்கூடாது என்று மாநில அரசுக்கும் வங்கிகளுக்கும் புரிந்துணர்வு ஒப்பந்தங்கள் செய்யப்பட்டுள்ளன. ஒப்பந்தங்களை மீறும் வங்கிகளின் பரிவர்த்தனைகள் வேறு வங்கிகளுக்கு மாற்றப்படும்.

தமிழ்நாடு அரசு மகளிரின் நல்வாழ்வுக்காக வழங்கும் மகளிர் உரிமைத்தொகையை வங்கிகள் தங்களது நிர்வாக காரணங்களுக்காக பிடித்தம் செய்யக்கூடாது என்பது மத்திய நிதி மந்திரிக்கு கடிதம் எழுதப்படும்.

மகளிர் உரிமைத் தொகையில் பிடித்தம் செய்யப்பட்டிருந்தால் அது குறித்து புகார் அளிப்பதற்கு முதல்-அமைச்சரின் முகவரி உதவி மைய தொலைபேசி எண் 1100-ஐ அழைத்து புகார் அளிக்கலாம். அளிக்கப்படும் இப்புகார்கள் குறித்து விசாரித்து உரிய நடவடிக்கை எடுக்கப்படும்." இவ்வாறு அதில் தெரிவிக்கப்பட்டு உள்ளது