மீண்டும் புத்துயிர் பெறும் பிச்சைக்காரர்கள் மறுவாழ்வு திட்டம்
1972-ம் ஆண்டு தமிழ்நாட்டில் பிச்சைக்காரர்களின் நலனை கருத்தில் கொண்டு அவர்களுக்காக மறுவாழ்வு திட்டத்தை மறைந்த முதல்-அமைச்சர் கருணாநிதி கொண்டு வந்தார்.
இதன் மூலம் பிச்சைக்காரர்கள் மீட்கப்பட்டு அவர்கள் தகுதிக்கு ஏற்ப சுயதொழில் வேலைவாய்ப்புகளை அரசு உருவாக்கிக் கொடுத்தது.
ஓடி ஒளிந்தார்கள்
* ரெயில் நிலையங்கள், பஸ் நிலையங்கள், வழிபாட்டுத் தலங்கள் என்று மக்கள் கூடுகிற இடங்களில் பிச்சை எடுப்பவர்களை, வாகனங்களில் வந்து பிடித்துப் போவார்கள்.
அரசு வாகனங்கள் வருவதைக் கண்டாலே போதும் தங்களைப் பிடிக்க வருகிறார்கள் என்று பிச்சைக்காரர்கள் ஓடி ஒளிந்தார்கள்.
* அவ்வாறு பிடித்துப் போனவர்களில் நோயாளிகளாக இருந்தால் அரசு மருத்துவ மனைகளில் சேர்த்து சிகிச்சை அளிக்கப்படும்.
* மன நோயாளிகளாக இருந்தால் மனநல காப்பகத்தில் சேர்க்கப்படுவர்.
* மாற்றுத் திறனாளிகளாக இருந்தால் அவர்களின் தகுதிக்கு ஏற்ப சுயதொழில்கள் செய்ய ஏற்பாடுகள் செய்யப்படும்.
* நிர்பந்தங்களால் பிச்சை எடுக்க வந்தவர்களாய் இருந்தால் உறவினர்கள் அடையாளம் காணப்பட்டு அவர்களிடம் ஒப்படைக்கப் படுவார்கள்.
* இதற்காக தமிழ்நாட்டில் 6 இடங்களில் பிச்சைக்காரர்கள் மறுவாழ்வு மையங்கள் கட்டித் தரப்பட்டன.
இது ஒரு உன்னதமான சமூகநலத் திட்டம். இதை ஒழுங்காக நடைமுறைப் படுத்தி இருந்தால் பிச்சைக் காரர்களின் பெருக்கத்தைக் கட்டுப்படுத்தி இருக்க முடியும்.
காசு பார்க்கும் கயவர்கள்
'பிச்சை எடுத்து உண்ணுவது அவமானம். உழைத்து உண்பதே தன்மானம்' என்பது அந்தத் திட்டத்தின் நோக்கமாக அமைந்தது.
நாளடைவில் அது முடங்கிப் போனதால் பஸ், ரெயில் நிலையங்கள், போக்குவரத்து சிக்னல்கள், வழிப்பாட்டு தலங்கள் போன்ற இடங்கள் மீண்டும் பிச்சைக்காரர்களின் புகலிடமாக மாறிப்போயின.
குழந்தைகளின் வயிற்றுப் பசியைப் போக்குவதற்காக ஆதரவற்ற முதியோர்கள் பிச்சை எடுக்கும் நிலைக்கு ஆளாகுகின்றனர். அதே நேரம், உழைக்காமல் கையை நீட்டினாலே பணம் கிடைப்பதால் பிச்சை எடுப்பதை தொழிலாக பலர் செய்யவும் துணிகிறார்கள்.
இதில் கொடுமை என்னவென்றால்? குழந்தைகள், பெண்களை கட்டாயப்படுத்தி இந்தத் தொழிலில் தள்ளி காசு பார்க்கும் கயவர் கூட்டமும் நிழல் மறைவாய் இருக்கத்தான் செய்கிறது. இயக்குனர் பாலாவின் 'நான் கடவுள்' திரப்படம், இந்த அக்கிரமத்தை வெளிச்சம் போட்டு காட்டி இருந்தது.
பிச்சைக்காரர்கள் மறுவாழ்வுக்காக மத்திய அரசு ரூ.182 கோடி நிதி ஒதுக்கீடு செய்திருக்கிறது. டெல்லி, மும்பை, சென்னை, பெங்களூர், ஐதராபாத், இந்தூர், லக்னோ, நாக்பூர், பாட்னா, அகமதாபாத் ஆகிய 10 நகரங்களில் இந்தத் திட்டம் அமல்படுத்தப் படுகிறது.
போலீஸ் நடவடிக்கை
தற்போது தமிழ்நாட்டில் பிச்சைக்காரர்களை கட்டுப்படுத்தவும், அவர்களுக்கு மறுவாழ்வு கொடுக்கவும் நடவடிக்கை எடுக்கப்பட்டு வருகிறது. வெளி மாநிலங்களைச் சேர்ந்த சிலரும் தமிழ்நாட்டில் பிச்சை எடுப்பதை தொழிலாகச் செய்து வருகிறார்கள். போக்குவரத்து அதிகமாக இருக்கும் 'சிக்னல்' பகுதிகளில் அவர்களைக் குழந்தை குட்டிகளுடன் காணமுடிகிறது.
இந்த நிலையில் 'ஆபரேஷன் மறுவாழ்வு' என்ற அதிரடி நடவடிக்கையை தமிழக போலீஸ்துறை கையில் எடுத்துள்ளது. இதன் மூலம் கடந்த 3-ந்தேதி முதல் மாநிலம் முழுவதும் பிச்சைக்காரர்கள் மீட்கப்பட்டு வருகின்றனர்.
மீட்கப்படும் பிச்சைக்காரர்கள் அரசு காப்பகங்கள், மறுவாழ்வு மையங்கள், குடும்பத்தினரிடம் ஒப்படைக்கப்படுகிறார்கள்.
பெண்கள், குழந்தைகளை பிச்சை தொழிலில் ஈடுபடுத்தும் நபர்கள் மீது குண்டர் தடுப்பு சட்டத்தில் கைது நடவடிக்கை எடுக்கப்படும் என்று போலீஸ் டி.ஜி.பி. சைலேந்திரபாபு கடும் எச்சரிக்கையையும் விடுத்துள்ளார்.
இதில் கண்துடைப்பு இல்லாமல் உணர்வுப் பூர்வமான நடவடிக்கைகள் இருக்கும் என்றால் பிச்சை எடுப்பவர்கள் கட்டுப்படுத்தப்படுவதுடன் மறுவாழ்வும் பெறுவார்கள் என்பதில் மாற்றுக் கருத்து இல்லை.
பிச்சை எடுக்கும் தொழிலை ஒழிப்பதற்காக எடுத்துவரும் இந்த நடவடிக்கை ஏற்படுத்திவரும் தாக்கம் குறித்து பொதுமக்கள் கூறிய கருத்துகள் வருமாறு:-
ஆதங்கம்
எலங்காலபட்டியை சேர்ந்த பழனியம்மாள்:-
பஸ் நிலையம், கோவில்கள் உள்ள பகுதிகளில் பிச்சை எடுபவர்கள் அதிக அளவில் உள்ளனர். முன்பு பிச்சைக்காரர்களிடம் ஒரு ரூபாய் அல்லது 2 ரூபாய் கொடுத்தால் கூட அவர்களுடைய முகத்தில் மகிழ்ச்சி வெளிப்படும். ஆனால் இப்போது 5 ரூபாய்க்கு குறைவாக கொடுத்தால் அதை சந்தோஷமாகப் பெற்றுக் கொள்வதில்லை. சாலை ஓரங்களில் வயது முதிர்ந்த முதியவர்களை பார்க்கும்போது அவர்களுக்கு ஏதாவது உதவிகளை செய்ய வேண்டும் என்ற எண்ணம் நமக்கு ஏற்படுகிறது.
ஆனால் நல்ல உடல் ஆரோக்கியத்துடன் இருக்கும் சிலர் மிகவும் நாகரிகமாக கையேந்தி பிச்சை எடுக்கிறார்கள். இவ்வாறு உழைக்காமல் உடலை வளர்ப்பவர்கள் மீது நடவடிக்கை எடுக்கப்படுமா? என்ற ஆதங்கம் ஏற்படுகிறது. உழைத்து சாப்பிடுவதன் சிறப்பு குறித்து இவர்களுக்கு சரியான அறிவுரைகள் வழங்க வேண்டும்.
உழைத்து வாழ வேண்டும்
எர்ரனஅள்ளியை சேர்ந்த மாற்றுத்திறனாளி பழனி:-
மாற்றுத்திறனாளிகளில் பெரும்பாலானோர் தன்னம்பிக்கையுடன் உழைத்து வாழ விரும்புகிறார்கள். நல்ல உடல் நலத்துடன் இருப்பவர்களில்தான் பலர் பிச்சை எடுக்கிறார்கள். உடலில் தெம்பு இருக்கும் வரை உழைத்துதான் வாழ வேண்டும் என்ற மன உறுதியுடன் செயல்பட்டு வருகிறேன். தொழிலாளியாக ஊரக வேலை உறுதி திட்ட பணி உள்ளிட்ட பணிகளுக்கு சென்று அதில் கிடைக்கும் வருமானம் மூலம் வாழ்க்கை நடத்தி வருகிறேன்.
என்னைப் போன்ற மாற்றுத்திறனாளிகளுக்கு மாத உதவித்தொகை உள்பட பல்வேறு நலத்திட்டங்களை தமிழக அரசு வழங்கி வருகிறது. தற்போது பிச்சை எடுப்பவர்கள் மீட்கப்பட்டு மறுவாழ்வு இல்லங்களில் தங்க வைக்கப்படுவது வரவேற்கத்தக்கது.
பாராட்டுக்குரியது
சமூக ஆர்வலர் சசிகுமார்:-
மன அமைதிக்காக பக்தர்கள் செல்லும் கோவில்கள் உள்ள பகுதியில் பிச்சைக்காரர்கள் அதிக அளவில் இருக்கிறார்கள். இவர்களில் பலர் கோவிலில் நுழையும் போதும், வெளியில் வரும்போதும் பின் தொடர்ந்து வந்து பிச்சை கேட்பதால் பக்தர்களுக்கு தர்மச்சங்கடம் ஏற்படுகிறது. நிம்மதியைத் தேடி கோவில்களுக்கு செல்பவர்கள் பிச்சைக்காரர்களின் நச்சரிப்பை தொடர்ந்து சந்திக்கிறார்கள். சில பிச்சைக்காரர்கள் காசு இல்லை என்று சொன்னால் ஏற்றுக் கொள்கிறார்கள். ஆனால் சிலர் காசு கொடுத்துதான் ஆக வேண்டும் என்று ஏதோ வழிப்பறி செய்வது போன்று துரத்துகிறார்கள்.
அவர்கள் இம்சை தாங்க முடியாமல் பணம் கொடுத்துவிட்டு செல்லும் நிலை ஏற்படுகிறது. தற்போது பிச்சைக்காரர்களை மீட்டு மறுவாழ்வு மையத்தில் ஒப்படைக்கும் நடவடிக்கை பாராட்டுக்குரியது. இந்த நடவடிக்கையை தொடர்ந்து மேற்கொள்ள வேண்டும். தற்போது தமிழக காவல்துறை தொடங்கி உள்ள ஆபரேஷன் மறுவாழ்வு நடவடிக்கை வரவேற்கத்தக்கது.
தீவிர கண்காணிப்பு
பாலக்கோட்டை சேர்ந்த போலீஸ் இன்ஸ்பெக்டர் தவமணி:-
சாலையோரங்களில் திரியும் மனநலம் பாதிக்கப்பட்டவர்கள், வயது முதிர்ந்தவர்கள் பிச்சை கேட்டால் பெரும்பாலானவர்கள் மறக்காமல் தங்களால் முடிந்த தொகையை கொடுத்துவிட்டு செல்கிறார்கள். சிலர் அவர்களை தேடி சென்று உணவு, உடை ஆகியவற்றை கொடுத்து விட்டு செல்கிறார்கள். சாலையோரங்களில் உள்ள மனநலம் பாதிக்கப்பட்டவர்கள் மற்றும் முதியவர்களை நாங்கள் மீட்டு எங்கள் செலவில் துணிமணிகள் மற்றும் உணவு ஆகியவற்றை வாங்கி கொடுத்து மறுவாழ்வு மையங்களுக்கு அனுப்பி வைக்கிறோம். அதே நேரத்தில் நல்ல உடல் நலத்துடன் உழைப்பில் ஆர்வம் இன்றி பொது இடங்களில் பிச்சை எடுத்து திரியும் நபர்களை கண்காணித்து பிடிக்க தற்போது தீவிர கண்காணிப்பு பணி மேற்கொள்ளப்பட்டு வருகிறது. அண்மையில் ஆபரேஷன் மறுவாழ்வு திட்டம் தொடங்கப்பட்டுள்ளது. இதன் மூலம் ஆதரவற்ற சிறுவர், சிறுமிகளை கட்டாயப்படுத்தி பிச்சை எடுக்க வைக்கும் நபர்களை கண்டறிந்து அவர்கள் மீது கடும் நடவடிக்கை எடுக்கப்படும்.
விடிவு ஏற்படும்
பாலக்கோடு பஸ் நிலையம் அருகே உள்ள ஜெரினா:-
எனக்கு 60 வயதிற்கு மேல் ஆகிறது. கணவர் கைவிட்டு விட்டதால் கடந்த 5 ஆண்டுகளுக்கும் மேலாக எந்த ஆதரவும் இல்லை. இதனால் இந்த பகுதியில் அமர்ந்து, இந்த வழியாக செல்பவர்களிடம் ஏதாவது கொடுங்கள் என்று கேட்பேன். சிலர் பணம் கொடுப்பார்கள், சிலர் சாப்பிட ஏதாவது வாங்கிக் கொடுப்பார்கள். இரவில் கடைகள் மூடப்பட்ட பின் படுத்து தூங்கி விடுவேன். இப்படியே என்னுடைய காலம் ஓடிக் கொண்டிருக்கிறது. பிச்சைக்காரர்களுக்கு மறுவாழ்வு திட்டத்தை செயல்படுத்தி, உரிய ஆதரவு அளித்தால் என்னை போன்ற ஆதரவு அற்றவர்களுக்கு விடிவு ஏற்படும்.
இவ்வாறு அவர்கள் கூறினர்.
ஆபரேஷன் மறுவாழ்வு நடவடிக்கை மூலம் மீட்கப்படும் வயதான பிச்சைக்காரர்களுக்கு மட்டும்தான் அடைக்கலம். உடல்நிலை நன்றாக உள்ள பிச்சைக்காரர்கள் மனதில் உழைத்து உண்ண வேண்டும் என்ற எண்ணத்தை விதைக்க வேண்டும் என்பதே சமூக ஆர்வலர்களின் வலியுறுத்தலாக உள்ளது.
வாரி வழங்கும் பிச்சைக்காரர்
பிச்சைக்காரர்கள் என்றால் ஏளனமாகப் பார்க்கும் சமுதாயத்தில் பாண்டி என்ற பிச்சைக்காரர் (72) தனது சமூக செயல்பட்டால் அனைவரது கவனத்தையும் ஈர்த்தவர்.
இவரது சொந்த ஊர் தூத்துக்குடி மாவட்டம் சாத்தான்குளம் தாலுகா ஆலங்கிணறு ஆகும். வசதியான குடும்பத்தில் பிறந்த இவர் தனது மனைவி மறைவுக்கு பின்னர் மன நிம்மதிக்காக திருச்செந்தூர் கோவிலில் தங்கத் தொடங்கினார். நாளடைவில் பிச்சை எடுக்கும் நிலைக்குத் தள்ளப்பட்டார்.
தனக்கு தானமாக கிடைக்கும் பணத்தில் அரசு பள்ளிக்கூடங்களுக்கு என்ன தேவை என்பதை அறிந்து உதவுவதை வழக்கமாகக் கொண்டு இருக்கிறார்.
அவர், 'பிச்சை எடுக்கும் தொகையில் ஒரு பள்ளிக்கு ரூ.10 ஆயிரம் ஒதுக்குவேன்' என்று பெருமிதத்துடன் கூறி இருக்கிறார்.
இலங்கை அரசு பொருளாதார நெருக்கடியில் சிக்கியபோது தமிழக அரசு உதவிக்கரம் நீட்டியது. அப்போது மதுரை கலெக்டரிடம் பாண்டி ரூ.20 ஆயிரம் நன்கொடை அளித்து பாராட்டைப் பெற்றார். கடந்த 2010-ம் ஆண்டு முதல் பிச்சை எடுக்கும் தொழிலில் ஈடுபட்டு வரும் பாண்டி தானமாக கிடைக்கும் பணத்தை சேமித்து வைத்து அரசு நலத்திட்டங்களுக்கு லட்சக்கணக்கில் நன்கொடை அளித்துள்ளார். கொரோனா காலக்கட்டத்தின்போது பிச்சைக்காரர்கள் பரிதவித்த போது முதல்-அமைச்சரின் கொரோனா நிவாரண நிதிக்கு பாண்டி நன்கொடை அளித்தவர் என்பது குறிப்பிடத்தக்கது.
குழந்தைகளை பயன்படுத்தி பிச்சை;
தகவல் தெரிவித்தால் பணம் வெகுமதி
குழந்தைகளைக் கடத்தி அவர்களைப் பிச்சைத் தொழிலில் ஈடுபடுத்தும் கும்பல் குறித்து 044-28447701 என்ற தொலைபேசி எண்ணில் புகார் அளிக்கலாம். தகவல் கொடுப்பவர்கள் விவரங்கள் ரகசியமாக வைக்கப்படும். அவர்களுக்குத் தகுந்த பண வெகுமதி அளிக்கப்படும் என்று போலீசார் அறிவித்துள்ளனர்.