ஆவடி: வீட்டின் பூட்டை உடைத்து நகை-பணம் கொள்ளை - மர்மநபர்களுக்கு போலீஸ் வலைவீச்சு

ஆவடி:

சென்னை, ஆவடி அடுத்த பட்டாபிராம் வெங்கடேஸ்வரா நகர் டிரைவர்ஸ் காலனியை சேர்ந்தவர் கீர்த்திராஜ் (வயது 21) பி.காம் பட்டதாரி. இவரது தந்தை லோகநாதன் கடந்த ஜனவரி மாதம் இறந்து விட்டதால், தனது தாயார் தனம் மற்றும் அக்கா சங்கீதா ஆகியோருடன் குடும்பத்துடன் வசித்து வருகிறார்.

இந்நிலையில் கடந்த 27-ந் தேதி மாலை வீட்டை பூட்டிவிட்டு சென்னை அடுத்த மணலி பகுதியில் வசிக்கும் தனது பெரியம்மா பிரபாவதி வீட்டிற்கு குடும்பத்துடன் சென்றிருந்தார். இந்நிலையில் இன்று காலை இவரது வீட்டின் அருகில் வசிக்கும் சுசிலா என்பவர் கீர்த்திராஜிக்கு போன் செய்து உங்கள் வீட்டின் கதவு திறந்து இருக்கிறது என்று தகவல் கொடுத்துள்ளார்.

இதையடுத்து கீர்த்திராஜ் மணலியில் இருந்து உடனடியாக புறப்பட்டு வீட்டிற்கு வந்து பார்த்தார். அப்பொழுது வீட்டின் முன் பக்கம் இருந்த மரக்கதவு பூட்டு உடைக்கப்பட்டு கிடந்தது.

இதனால் அதிர்ச்சியடைந்த கீர்த்திராஜ் உள்ளே சென்று பார்த்தபோது, மர்ம நபர்கள் வீட்டின் படுக்கை அறையில் இருந்த பீரோவை உடைத்து, அதிலிருந்து 20 பவுன் நகை மற்றும் ரூ. 3 லட்சம் பணம் ஆகியவற்றை கொள்ளையடித்து சென்றிருப்பது தெரியவந்தது.

இதுகுறித்து கீர்த்திராஜ் ஆவடி போலீசில் புகார் கொடுத்தார். புகாரின் பேரில் ஆவடி குற்றப்பிரிவு போலீசார் வழக்கு பதிவு செய்து அங்குள்ள சி.சி.டி.வி கேமராவில் பதிவான மர்ம நபர்கள் உருவத்தை வைத்து விசாரணை செய்து வருகின்றனர்.