மாட்டுவண்டி எல்கை பந்தயம்

மாட்டு வண்டி பந்தயம்

அரிமளம் அருகே கடியாப்பட்டி கிராமத்தார்கள் சார்பில், பொங்கலை முன்னிட்டு 20-ம் ஆண்டு மாட்டுவண்டி எல்கை பந்தயம் நேற்று நடத்தப்பட்டது. இதில் சிவகங்கை, புதுக்கோட்டை, திருச்சி, மதுரை, தஞ்சாவூர், ராமநாதபுரம் ஆகிய மாவட்டங்களில் இருந்து 36 ஜோடி மாட்டு வண்டிகள் கலந்து கொண்டன. பந்தயமானது பெரிய மாடு, சிறிய மாடு என 2 பிரிவாக நடத்தப்பட்டது. முதலில் நடைபெற்ற பெரிய மாடு பிரிவில் 11 ஜோடி மாட்டு வண்டிகள் கலந்து கொண்டன.

பெரிய மாடு போய் வர 8 மைல் பந்தய தூரம் நிர்ணயிக்கப்பட்டிருந்தது. இதில் முதல் பரிசை விராமதி தையல் நாயகி மாட்டு வண்டியும், 2-ம் பரிசை பூக்கொல்லை ரித்தீஸ்வரன் மாட்டு வண்டியும், 3-ம் பரிசை பொன்ன காடு நட்சத்திரா மாட்டு வண்டியும், 4-ம் பரிசை பொன்பேத்தி மருதுபாண்டியர் மாட்டு வண்டியும் பெற்றன.

சிறிய மாட்டு வண்டி

இதனைத் தொடர்ந்து நடைபெற்ற சிறிய மாடு பிரிவில் 24 ஜோடி மாடுகள் கலந்து கொண்ட ன. பந்தய தூரமானது போய்வர 6 மைல் நிர்ணயிக்கப்பட்டிருந்தது. இதில் மாட்டு வண்டிகள் அதிகம் பங்கு பெற்றதால் பந்தயமானது 2 பிரிவாக நடத்தப்பட்டது. இதில் முதல் பரிசை நெய்வாசல் மணி, வெளிமுத்தி வாகினி மாட்டு வண்டியும், 2-ம் பரிசை கரியப்பட்டி துரைராஜ், புலிமலைப்பட்டி வர்ஷிகா மாட்டு வண்டியும், 3-ம் பரிசை கல்லல் உடையப்பா, பீற்களைக்காடு பெரியசாமி மாட்டு வண்டியும், 4-ம் பரிசை வடகுடிப்பட்டி காளியம்மாள், கருப்பூர் வீரய்யா ஆகியோருக்கு சொந்தமான மாட்டு வண்டியும் பெற்றன.

பரிசு

தொடர்ந்து பந்தயத்தில் வெற்றி பெற்ற மாட்டின் உரிமையாளருக்கு ரொக்கப் பரிசு வழங்கப்பட்டது. பந்தயம் நடைபெற்ற திருமயம்- ராயவரம் சாலை இருபுறமும் திரளான பொதுமக்கள் வந்திருந்து பந்தயத்தை கண்டு ரசித்தனர். திருமயம் போலீசார் பாதுகாப்பு பணியில் ஈடுபட்டு இருந்தனர்.