இளைஞர்கள் கூட்டத்தின் நடுவே சீறிப்பாய்ந்து ஓடிய காளைகள்

மஞ்சுவிரட்டு விழா

பொங்கல் பண்டிகையை முன்னிட்டு வேலூர் மாவட்டத்தில் எருது விடும் திருவிழா நடத்தப்படும். சில இடங்களில் மஞ்சுவிரட்டு நடத்தப்படுவது வழக்கம். அதன்படி வேலூர் ரங்கா புரத்தில் மஞ்சுவிரட்டு நேற்று நடந்தது. இதை முன்னிட்டு பல்வேறு பகுதிகளை சேர்ந்த மாடுகளின் உரிமையாளர்கள், தங்கள் மாடுகளை குளிப்பாட்டி, அலங்காரம் செய்து, பட்டாசு வெடித்து, மேளதாளத்துடன் இளைஞர்கள் உற்சாகமாக அழைத்து வந்தனர்.

அதைத்தொடர்ந்து பிள்ளையார் கோவில் தெருவில் ஒன்றன்பின் ஒன்றாக மாடுகள் அவிழ்த்து விடப்பட்டது. அப்போது அங்கு கூடியிருந்த இளைஞர்கள் கூட்டத்தின் நடுவே சீறி பாய்ந்து ஓடியது.

பார்வையாளர்களை முட்டியது

இளைஞர்கள் கைகளால் மாடுகளை தட்டி உற்சாகப்படுத்தினர். சில மாடுகள் பார்வையாளர்களை முட்டியது. சிலர் தடுமாறி கீழே விழுந்தனர். மாடுகளும் மோதிக்கொண்ட சம்பவமும் நடந்தது.

இந்த விழாவைக்காண வேலூர் சுற்று வட்டாரத்தை சேர்ந்த பொதுமக்கள் பலர் ரங்காபுரத்தில் குவிந்தனர். அவர்கள் வீட்டின் மாடியில் நின்று வேடிக்கை பார்த்தனர். சிலர் புகைப்படம் எடுத்தும், செல்பி எடுத்தும் மகிழ்ந்தனர். 50-க்கும் மேற்பட்ட மாடுகள் ஓட விடப்பட்டது. இந்த விழாவால் அந்த பகுதி பரபரப்பாக காணப்பட்டது.