மோட்டார் சைக்கிள் மீது கார் மோதி இறைச்சி கடைக்காரர் சாவு

வேதாரண்யம்:

வேதாரண்யம் அருகே புஷ்பவனத்தை சேர்ந்தவர் குனேஷ் (வயது 36) இவர் கோழி இறைச்சி கடை வைத்து நடத்தி வந்தார். இவருடைய மனைவி இளமதி. இவர்களுக்கு ஒரு ஆண் குழந்தை உள்ளது. இவர் சம்பவத்தன்று புஷ்பவனத்தில் இருந்து செம்போடைக்கு மோட்டார் சைக்கிளில் வந்து கொண்டிருந்தார். அப்போது செம்போடை-புஷ்பவனம் சாலையில சென்ற போது எதிரே வந்த கார், மோட்டார் சைக்கிள் மீது மோதியது. இதில் படுகாயம் அடைந்த குனேசை அக்கம் பக்கத்தினர் மீட்டு சிகிச்சைக்காக வேதாரண்யம் அரசு ஆஸ்பத்திரிக்கு அனுப்பி வைத்தனர். பின்னர் அங்கிருந்து மேல்சிகிச்சைக்காக தஞ்சை அரசு மருத்துவக்கல்லூரி ஆஸ்பத்திரிக்கு அனுப்பி வைத்தனர். அங்கு சிகிச்சை பலனின்றி குனேஷ் பரிதாபமாக உயிரிழந்தார். இதுகுறித்த புகாரின் பேரில் வேதாரண்யம் போலீசார் வழக்குப்பதிவு செய்து விசாரணை நடத்தி வருகின்றனர்.